|
U
shënua solemnisht dita e shkollës në Bujanoc
BUJANOC, 24 MAJ
Në oborrin e shkollës fillore " Naim Frashëri
", në Bujanoc, të shtunën, u shënua solemnisht
dita e shkollës.
Për të shënuar këtë ditë të
kolosit tonë të madh kishin ardhur edhe personalitete
të këtushme politike, si dhe udhëheqësit komunalë
të Dardanës të prirë nga Shaip Surdilli. Por,
begatinë më të madhe këtij manifestimi ia
solli ardhja e Karvanit të Shkrimtarëve për Fëmijë
nga Kosova, të cilët vazhduan rrugëtimin e tyre
të dashurisë edhe në Luginë.
Fillimisht, drejtori i shkollës Fatmir Hasani, duke folur
për historikun e kësaj shkolle, ai njoftoi të pranishmit
për peripecitë me të cilat u përball kjo shkollë
për mëse një dekadë të tërë,
dhe tani shtoi ai, sot po e festojmë ditën e shkollës
sonë "Naim Frashëri", emër të cilin
me sakrificë e çelnikosëm në dheun e kësaj
toke arbërore. Po bëhet një vit që kjo shkollë
u emërtua dhe iu është vënë busti i kolosit
tonë të madh të letërsisë shqipe, Naim
Frashëri”, theksoi, ndër të tjera Hasani.
Madhështinë e këtij manifestimi e shtoi kori i
shkollës "Filizat", si dhe grupi i recitatorëve
"Njomëza", të cilët me programin e pasur
kulturo-artistik, kënaqën të pranishmit.
Në fund, të manifestimit, së pari në Shtëpinë
e Kulturës në Bujanoc, pastaj edhe në atë
të Preshevës, u mbajtë nga një orë letrare,
për hirë të Karvanit të Shkrimtarëve
për Fëmijë nga Kosova, të cilët ecën
rrugës së tyre të dashurisë edhe në këtë
rajon, dhe se ishin këto çaste kur fëmijët
e Luginës, përmes shkrimtarëve nga Kosova, e ndien
edhe më shumë ngrohtësinë e atdheut të
tyre, ngase ishte një takim i parë i pasluftës.
Rinia dhe fëmijët, të emocionuar me ardhjen e
shkrimtarëve nga Kosova, nuk hezitonin ta shprehnin gëzimin
e tyre, dhe se i dhanë edhe më shumë madhështi
këtyre orëve letrare.
Vargjet e tyre poetike në këto orë letrare, në
Bujanoc dhe në Preshevë, përveç shkrimtarëve
nga Kosova, i lexuan edhe disa nxënës në Bujanoc
dhe në Preshevë.
Karvani i Shkrimtarëve për Fëmijë nga Kosova,
të prirë nga: Rifat Kukaj, Agim Deva, Arif Demolli,
Xhevat Syla, Zejnullah Halili, Gani Xhafolli Avdush Camaj dhe
Veli Veliu, e begatuan edhe më shumë manifestimin e
sotëm të shkollës fillore "Naim Frashëri",
në Bujanoc.
Metali Krasniqi
21.06.2002
|
|
