Bashkohen Msn Live Messenger dhe Yahoo Messenger with Voice

Yahoo! dhe Microsoft kanë raportuar fillimin e testimit të bashkë-operimit të shërbimit për dërgimin e porosive të shpejta, duke i mundësuar shfrytëzuesve të Windows Live Messenger dhe Yahoo! Messenger me Zë të komunikojnë mes vete.

Sipas raporteve ky bashkëpunim do të jetë i pari i këtij lloji mes dy ofruesve të këtij lloji të shërbimeve dhe do të formojë grupin më të madhë të përdoruesve të porosive të shpejta (Instant Messaging) me rreth 350 milion përdorues.

Me këtë bashkëpunim përdoruesit e Yahoo Messenger do të mund të shtojnë në listën e kontakteve përdorues të Hotmailit apo MSN-së, gjithashtu përdoruesit e MSN Live Messenger do të mund të shtojnë në listën e kontakteve personat me email të Yahoo-së.

Blake Irvin nga Microsoft tha: "Bashkëpunimi i parë i këtij lloji mes liderëve të porosive të shpejta, Microsoft dhe Yahoo!, i jep përdoruesve një kontroll të madhë, lehtësi, dhe liri në eksperiencën e web komunikimit me Windows Live. Ne jemi krenar të lansojmë këtë arritje të fundit në sherbimet e porosive të shpejta të cilat i motivojnë njerëzit të komunikojnë virtualisht me kë të dojë, ku të dojnë dhe kur të dojnë."

Brad Garlinghoues, nga Yahoo! tha se "Bashkëpunimi mes shërbimeve të porosive të shpejta rrit listën e shërbimeve dhe me një bashkëpunim mes Yahoo! dhe Microsoft-it ne jemi të lumtur të ofrojmë një eksperiencë të kombinuar për përdoruesit në tërë botën."

Përdoruesit e Yahoo! dhe Microsoft-it do të jenë në gjendje të kenë përparësi të shfrytëzimit të këtij beta programi. Këta shfrytëzues do të jenë të parët që do të shfrytëzojnë këtë shërbim të ri pa pagesë. Bëhet e ditur se në muajt e ardhshëm shumë përdorues do të mund të testojnë këtë shërbim.

Yahoo dhe Microsoft kanë punuar në këtë për disa vite të fundit dhe kanë paralajmëruar planet e tyre për të bashkuar sistemet e tyre që nga viti i kaluar. Problem është inkorporimi i shërbimeve me AOL, e cila ka në pronësi AIM dhe ICQ. Të dyja Microsofti dhe Yahoo kanë tentuar të bashkëpunojnë me AOL në këtë drejtim që nga viti 1999, kur AOL filloi të ndalojë disa protokole të AIM.

 
© presheva.com