Intervistë me kryetarin e komunës së Bujanocit z.Nagip Arifi

Kosova Lindore ka garancinë nga grupi i kontaktit, e në anën tjetër të medaljes, ka referendumin e 1 dhe 2 marsit të 1992


Cyrin, 05 mars
Pas disa takimeve që i kishte realizuar me miqë zviceranë në lidhje me zhvillimin dhe investimin e zviceranëve në komunën e Bujanocit, kryetari i kësaj komune z.Nagip Arifi me delegacionin e tij, vizitoi edhe redaksinë e gazetës sonë, si dhe realizoi disa takime me bashkatdhetarë dhe iu bashkua ambienteve festive të bashkatdhetarëve tanë për pavarësinë e Kosovës, përvjetorit festiv të Referendumit të 1, 2 marsit 1992, si dhe përvjetorit të madh festiv të Lidhjes së mërgimtarëve të fshatit Tërnoc me qendër në Zvicër, ku ne u takuam dhe e realizuam këtë intervistë dhe z.Arifi na njoftoi për situatën aktuale në Kosovën Lindore pas shpalljes së shtetësisë së Republikës së Kosovës, për gjendjen momentale të policisë multietnike, si dhe për shumë çështje tjera.Bota sot:Z.Arifi, fillimisht ju përgëzojmë për pavarësinë e Kosovës.

Nagip Arifi: Ju jemi mirënjohës për këtë urim dhe gjithashtu urime edhe juve, lexuesve tuaj dhe gjithë redaksive të kombëtares 'Bota sot', kur dihet se keni kontribuar me shumë mund për këtë ditë të madhe në fushën e informimit të shpejtë, profesional dhe të saktë.Kujtojmë dhe përkulemi para veprës së madhe diplomatike që ka dhënë arqitekti i pavarësisë së Kosovës, presidenti historik i Kosovës, tashmë i ndjerë Prof.Dr.Ibrahim Rugova, vepra heroike dhe e pashembullt e kryeheroit legjendar Adem Jashari, familjes Haradinaj e shumë dëshmorëve të tjerë, si dhe invalidëve të luftës.Në këtë ditë gëzimi, shumë nëna kanë mbetur pa bijtë e tyre, shumë jetimë, e shumë e shumë invalidë të luftës dhe shumë bashkëkombas të pagjetur, por tani si gjithmonë të jenë krenare, sepse u kurorëzuam me pavarësi.Lavdi dëshmorëve dhe pushofshin të qetë në Kosovën e pavarur, në tokën e Dardanisë Antike.

Bota sot: Mund të na njoftoni me gjendjen aktuale që po mbretëron në Bujanoc dhe në dy komunat tjera shqiptare ate të Preshevës dhe Medvegjës?

Nagip Arifi:Kosova Lindore dhe i gjithë populli shqiptar është mësuar me situata të rënda, gjysmë të rënda, provokative dhe tepër të rrezikishme.Menjëherë pas shpalljes së pavarësisë së Kosovës, në të gjitha komunat shqiptare të Kosovës Lindore, është vërejtur një lëvizje e madhe e makinerisë serbe drejtuar pikave të ndryshme strategjike.Duhet ta dinë ata që e dinë por nuk duan ta pranojnë realitetin se pavarësia e Kosovës sjell stabilitet në Europën Jugperendimore.Banorët e Kosovës Lindore, si gjithmonë, janë gati që ti përballojnë situatave të ndryshme, si të gëzimit dhe atyre të hidhërimit.Me një vullnet të madh dhe gëzim të paparashikueshëm e kanë festuar fitoren e madhe të kombit tonë, shtetësinë e Kosovës, për të cilën kanë dhënë jetën shumë dëshmorë dhe kanë mbetur shumë invalidë të luftës.Popullata e kësaj ane, nuk është në gjumin e dimrit, por këtë gjum natyrshëm ia kanë lënë ariut nëse është duke fjetur, por me gjakftohtësi pret situatat që mund të ndodhin.Asesi nuk guxojmë të biem në kurth të atyre që kanë përgatitur dhe përgatitin kurthe për të keqen tonë, por këtë kurth logjikisht do ia sjellin vetes, sepse ne jemi të qetë, të pafajshëm dhe në tokat tona shekullore.Jemi tolerant, respektojmë çdo komb, çdo fe, e çdo racë.Duam të bashkëpunojmë me ata që e duan punën, me ata që nuk duan konflikte dhe me ata që kanë projekte të mira të integrimit në Bashkimin Europian. Kurrë nuk kemi qenë më të fortë se tani, më unik se tani.Situata në këto tre komuna mund të them lirisht se është relativisht e qetë edhe pse ka pasur lëvizje dhe përforcime të forcave ushtarake, paraushtarake apo pas ushtarake.Me një fjalë, potencoj se nuk kemi pasur ndonjë incident në qytet apo fshat, përjashto në kufirin e sotëm afër Medvegjës, pas incidenteve tashmë të njohura për gjithë opinionin.Ju thashë edhe më lartë, bashkëkombasit tanë të tre komunave, përcjellin situatën sikur sytë e tyre të ballit, nëse i prek do kesh dhimbje, por nëse ti prek dikush atëherë mundet të mbetet pa sy...Kemi pasur disa takime me banorë që të mos bien pre e provokimeve. Shpresojmë, se qeveria e sotme e serbisë, e cila po ec fatkeqësisht me modelin e të vjetrës, do të largohet apo do shërohet nga komplekset e kombinuara dhe të ndihmuara nga shumë kush, sepse serbët duhet ta dinë se po i sjellin telashe vetes më shumë dhe po fundosen në detin e madh e të pafundmë. Neve shqiptarëve, qoftë në Shqipëri, Kosovë, Maqedoni, Mal të Zi e çamëri, nuk ka kush të na ndajë shpirtërisht, në tradita, zakone e gjuhë e flamur, ne jemi një dhe ashtu do të jemi përgjithmonë, krijojmë shtete, por jemi një komb dhe e kemi një gjuhë.Nuk kemi faj ne që qefinin e kanë prerë gabimisht për popullin shqiptar, na kanë rrudhur në gjeografi.Të bashkuar do të jemi në bashkimin europian, sepse ninunallat e fëmijërisë sonë për rritje, kanë qenë të njejta si për drenicakun, tetovarin, preshevarin apo hotianin, kudo i thuhet bukës bukë e ujit ujë, tokë tokë e qiellit qiellë.

Bota sot:Po cili është bashkëpunimi juaj me qeverinë shqiptare në Tiranë dhe ate të Kosovës?

Nagip Arifi: Natyrisht, kanë qenë të ngrohta ashtu vëllazërore, si përgjithmonë.Kontaktojmë, kuvendojmë dhe realizojmë me një mendim, me një qëndrim dhe me një zemër e shpirt.Kemi kontakte të shpeshta dhe i përgëzojmë për ndihmën që na japin dhe mbështetjen të parezervë dhe në çdo kohë.

Bota sot: Si qëndroni me faktorin ndërkombëtar që është në Serbi, e kam fjalën, keni takime me ambsadorë të shteteve të ndryshme që janë së vepruari në këtë shtet?

Nagip Arifi: E kam parasysh pyetjen.Po, sinqerisht, me të gjitha ambsadat qëndrojmë mirë, kemi kontakte të vazhdueshme dhe shumë miqësore. Realizojmë kontakte parasegjithash me ambasadorin amerikan, të britanisë së madhe, të zvicrës, gjermanisë, italisë, francës etj. Këto përfaqësi ndërkombëtare diplomatike, po e përcjellin situatën ashtu në përpikshmëri dhe padyshim se gjithçka do të jetë në rrugën e së mirës dhe të merituarës.Shpresojmë se situata do të rregullohet ashtu si duhet në të gjitha drejtimet në Kosovë, sepse ashtu edhe ka filluar mirë, duke e njohur Kosovën shumë shtete të fuqishme botërore, si SHBA, Anglia, Gjermani, Franca, Italia etj.Kosova e pavarur do të sjell shumë shpejt edhe stabilitetin e gjithë Europës dhe këtë e kanë kuptuar të gjithë.

Kosova Lindore apo Lugina e Preshevës është udhëkryq i shumë rrugëve strategjike që lidhin Ballkanin dhe Evropën

Bota sot:Atëherë, ku do të mbetet Kosova Lindore, tani pas pavarësisë së Kosovës?

Nagip Arifi:Siç dihet Kosova Lindore apo siç po quhet edhe ndryshe Lugina e Preshevës, është e përbërë nga tre komuna etnike shqiptare, Presheva, Bujanoci dhe Medvegja. Presheva dhe Bujanoci me shumicë shqiptare, kurse në Medvegjë shqiptarët kanë mbetur pakicë për shkak të shpërnguljes në Kosovë e gjetiu me të vetmin shkak, ngase po maltretohen herë pas here bashkëkombasit tanë në këto zona autoktone. Kosova Lindore, të gjithë e dinë, se nuk është e pasur me minerale, apo edhe është, por primare është në momentin tonë se është e një rëndësie të veçantë gjeostrategjike. Duhet kujtuar e rikujtuar se Kosova Lindore apo Lugina e Preshevës është udhëkryq i shumë rrugëve strategjike që lidhin Ballkanin dhe Evropën. Në këtë pjesë kalon rruga automobilistike 'Korridori 10' dhe hekurudha që e lidhin Greqinë, Maqedoninë me Evropën dhe anasjelltas Evropën me këto shtete dhe shtetet tjera mediterane. Rruga më e shkurtë dhe e shpejtë tokësore për të arritur ne Evropë nga kjo trevë shqiptare kështu që edhe për shtetin grek mbajtja e Luginës së Preshevës nën sundimin serb paraqet interes nacional grek. Në anën tjetër edhe për Serbinë kjo luginë paraqet interes të veçantë për ekonominë dhe qytetarët e saj , për të dalë në portin e Selanikut apo detin mesdhe duhet të kalojnë andej. Beogradi duke e ditur rëndësinë strategjike të kësaj treve, në vitin 1945 ndau nga Kosova komunat e Preshevës, Bujanocit dhe Medvegjës dhe ia bashkangjiti Kosovës komunën e Leposaviqit dhe Zubin Potokun, pra u bë një ndërrim territoresh. Poashtu në sferën ndërkombëtare Lugina e Preshevës është e rëndësishme për shkak se do të kalojnë pranë saj naftesjellësit dhe gazsjellësit qe vijnë nga Azia Qendrore.Prandaj, i gjithë problemi do të zgjidhet me mjetet demokratike dhe ne do të luftojmë paqësisht, që të drejtat tona të njihen ashtu kolektivisht si të serbëve apo sipas planit të Ahtisarit, pra le të jetë parim reciproriciteti.Kemi garanci edhe përkrahje nga grupi i Kontaktit dhe nuk mendojmë se do të vijnë deri te ndryshimet e atyre parimeve, por nëse vjenë deri te ndryshimi i projektit të grupit të Kontaktit, atëherë Presheva, Medvegja dhe Bujanoci, ka Referendumin e 1 dhe 2 marsit të vitit 1992, ku të gjithë shqiptarët u patën deklaruar dhe deklarohen për ribashkim me Kosovën.Jemi unik të gjithë, të tre komunat e Preshevës, Bujanocit dhe Medvegjës,e që në janar të vitit 2005 arritëm një marrëveshje dhe deklarata e aprovuar e shtatorit të vititt 2007, tregojnë qartë këto dy dokumente do të jenë modele së vepruari në të ardhmen.

Bota sot: Në rast provokimi, a keni marrur ndonjë garancion reagimi pozitiv nga faktori ndërkombëtar që është i vendosur në Kosovë?

Nagip Arifi: Po, kemi kontaktuar dhe kemi garancione edhe nga KFOR, sepse bota e civilizuar është e interesuar që kudo të ketë qetësi dhe prosperim.Ne gjithë botën e kemi afër.Ky shekull është i joni.

Bota sot: Shihen fërkime të spektrit politik në Kosovën Lindore?

Nagip Arifi:Momentet e vështira shqiptarët gjithmonë kanë ditur ti përballojnë.Gëzimin dhe hidhërimin e ndajmë së bashku, këtë e kemi traditë dhe do ta mbajmë përgjithmonë.Pikërisht më 16 shkurt 2008 ditë e shtunë, kemi lëshuar një komunikatë të përbashkët, qeverisë së Kosovës, qytetarëve të Kosovës Lindore dhe u kemi përgëzuar shpalljen e pavarësisë së Kosovës dhe u kemi bërë apel tek popullata të jetë e qetë dhe të mos bie pre e provokimeme të mundshme serbe, e në anën tjetër të festohet në mënyrën më dinjitoze. Bashkëpunimi me subjektet politike është shumë i mirë dhe ky bashkëpunim do të jetë edhe më i madh në të ardhmen, por ky bashkëpunim është edhe me institucionet e Shqipërisë dhe Kosovës dhe nuk do të marrim asnjë hap pa u konsultuar me faktorin politik të Shqipërisë dhe ate të Kosovës.

Bota sot: Po tani pas pavarësisë së Kosovës, Presheva, Bujanoci dhe Medvegja, do të jenë Kosovë Lindore, Luginë apo si?

Nagip Arifi: E dini sigurisht Referendumin e 1 dhe 2 marsit të vitit 1992, ku ishim unanimisht për Autonomi territoriale me të drejtë bashkimi me Kosovën.Nuk do të ketë ndarje të Kosovës, bashkimi i Kosovës me ndonjë shtet tjetër, atëherë do ta riaktivizojmë 1 dhe 2 marsin, ky realitet do të jetë në veprim atëherë, nëse vjenë deri te mos zbatimi i prinicipeve të Grupit të Kontaktit, pra menjëherë ne do të aktivizojmë 1 dhe 2 marsin e 1992, i cili është në përputhje me unanimitetin e këshilltarëve të tre komunave, pra të Preshevës, Bujanocit dhe Medvegjës dhe vullnetit të popullatës së kësaj ane.Për këtë pyetje ju përgjigja edhe pak më lartë edhe ate shkurtimisht. Nuk mundem të përgjigjem edhe aq shkurt.Shpresojë se është e mjaftueshme.

Bota sot: Cili është realisht, realiteti që është publikuar këto ditë me policinë multietnike, që po patrullojnë në Vranjë edhe ate natën?

Nagip Arifi: Disa policë që i kanë ftuar dhe kanë vepruar, kemi reaguar tek organet shtetërore serbe edhe ate menjëherë, por kemi njoftuar edhe shefin e OSBE-së në Beograd, sepse siç dihet OSBE-ja ka qenë e kyçur për formimin e policisë multietnike dhe përgjigja ka qenë e shpejtë dhe se këta pakë policë janë angazhuar për dy ditë në Vranjë, me arsyetimin se ka qenë një numër i madh i policëve nga Vranja në veprim të detyrës urgjente në Beograd pas protestës së serbëve që e patën. Ata policë shqiptarë kanë qenë vetëm në parapërgatitje për gjendje gatishmërie, e nuk kanë qenë të angazhuar nëpër rrugët e Vranjës ashtu si po përfolet.Shpresojmë se kjo nuk do të përsëritet asnjëherë dhe lajmet e kësaj natyre jo të mjaftueshme munden të ndikojnë në masë, prandaj burimet kryesore të lajmit duhet siguruar nga ngjarja kryesore, e jo nga burimi i tretë apo i katërt, burimi i drejpërdrejtë është më i sakti, kuptohet se tolerohen edhe burimi i dytë përmes telefonit në vend ngjarje etj, kjo është etikë profesionale.Nuk ka nevojë që të trumbetohet dhe të kemi zhvendosje të popullatës më pastaj, apo të zhvishet policia multietnike, sepse këtë situatë, këtë veprim të formulës është duke e përcjellur faktori ndërkombëtar.
 
Qeveria serbe nuk ka pasur vullnet të hap fakultetin e Mësuesisë, por kërkesa jonë është që të hapen disa degë në kuadër të universiteteve të Fakultetit Juridik dhe Ekonomik.

Bota sot: Kur edhe Presheva, Bujanoci dhe Medvegja do të kenë Universitet?

Nagip Arifi:Këtë pyetje e mora edhe nga disa bashkatdhetarë në Grenchen të Solothurnit në Zvicër.Vërtetë është interesimi i të rinjëve shumë i madh për studime dhe dihet se Presheva, Bujanoci dhe Medvegja, gjithmonë ka pasur studentë të suksesshëm.Ju njoftoj, se as një student që ka pasur rezultat të mirë dhe ka dashur të studiojë në Prishtinë nuk ka mbetur prapa,këtu duhet falënderuar Rektorin e Universitetit të Prishtinës Prof.Dr.Enver Hasanin dhe fakultetin e Shqipërisë dhe ate të Tetovës dhe të Shtulit.
Qeveria serbe nuk ka pasur vullnet të hap fakultetin e Mësuesisë, por kërkesa jonë është që të hapen disa degë në kuadër të universiteteve të Fakultetit Juridik dhe Ekonomik.Por, për momentin qeveria serbe nuk ka vullnet në këtë drejtim, kur dihet se në anën tjetër qytetarët janë tatim pagues të kësaj qeverie. Qeveria serbe nuk u jep kredi studentëve shqiptarë, të cilët studiojnë në qytete të ndryshme të Maqedonisë, Kosovës dhe Shqipërisë, me arsyetim se qeveria serbe nuk është themeluese e këtyre universiteteve, ku na bënë të qeshim me këtë arsyetim. Nga buxheti i komunës së Bujanocit, për vitin 2007 2008, kemi ndarë një shumë të mjaftueshme të hollash për studentët që studojnë në këto Universitete. Arsimit jemi duke i dhënë shumë përkrahje të madhe dhe në shkollën e mesme në Bujanoc 'Sezai Surroi', janë hapur drejtime të ndryshme që nga viti 2007 dhe është hapur edhe drejtimi i mjekësisë që vijnë nxënës edhe nga Presheva të vijojnë mësimin.Në vitin 2002 ky gjimnaz kishte 430 nxënës e sot 1250 nxënës.Kemi edhe 10 studentë të Bujanocit, që po studiojnë në Ankara të Turqisë dhe qeveria turke po i financon, si dhe pritet nga qeveria norvegjeze ti pranoj dy studentë për master 2008-2009, që do ti financojë po kjo qeveri.

Bota sot: Si po funksionon pika kufitare në Konçul?

Nagip Arifi: Kjo pikë është duke kryer detyrën ashtu si duhet dhe nuk asnjë problem.
Bota sot:Për fund, do të marrim një përshtypje për organizimin e diasporës drejt atdheut e në veçanti punën që ka bërë Lidhja e Mërgimtarëve të fshatit 'Tërnoc' për Zvicë deri më tani, ku ishit edhe në manifetsimin e dy përvjetorëve dhe festës së pavarësisë së Kosovës?

Nagip Arifi: Fshati Tërnoc është fshati më i madh i këtyre tre komunave dhe njëherit mundet të thuhet edhe më i madhi në rajon.Nga ky fshat kanë dalur shumë intelektualë, luftëtarë dhe biznesmen e humanist.Lidhja e mërgimtarëve për Zvicër, e kryesuar nga z.Skender Jusufi nga fshati Tërnoc, është për tu përshëndetur.Uniteti i mërgimtarëve është rezultat i punës dhe kontributit që kanë dhënë dhe po japin për Tërnocin, Bujanocin dhe Kosovën Lindore në përgjithësi, pa përjashtuar ndihmat edhe Kosovës, Maqedonisë dhe atje ku ka nevojë.Kam mbetur shumë i kënaqur me manifetsimin e trefishtë festivë, organizim i mirëfilltë dhe shumë i sinqertë.I përshëndes edhe njëherë të gjithë këta mërgimtarë të respektuar, që kanë punuar, po punojnë dhe po mbajnë edhe familjet e tyre në vendlindje.Vërtetë bashkatdhetarët janë të respektuar shumë, sepse është pjesë e popullit tonë, që nuk po e shijonë atdheun ashtu si duhet, por ne do ti japim kushte të mira që ata të investojnë në vendet tona, kanë ku të investojnë, të hapim edhe vende të reja pune dhe për lirim nga taksat do ti lirojmë në biznesin e tyre për dy vite me radhë.Me që po afrohen edhe pushimet verore, kur edhe bashkatdhetarët vijnë me të madhe dhe gjallërohet edhe më shumë atdheu ynë, do ti drejtohemi edhe organeve qeveritare, por do ta njoftojmë edhe faktorin ndërkombëtar, që të mos maltretohen bashkatdhetarët tanë, por të vijnë si duhet dhe të kalojnë pushimin si duhet.
 
Bota sot:Ju faleminderit z.Arifi.

Nagip Arifi:Ishte kënaqësi dhe ndjehem i nderuar që dhashë intervistën e parë për mediat shqipe pas pavarësisë së Kosovës.Puna e mbarë dhe shpresojmë, se gazeta kombëtare 'Bota sot', sikur deri tani, do u jep hapësirë zhvillimeve të ndryshme në Preshevë, Bujanoc dhe Medvegjë.Suksese.
 
 
Intervistoi:Dashnim HEBIBI, redaktor i diasporës në kombëtaren 'Bota sot' dhe redaktor i TV Diaspora në kuadër të RTK-së për redaksinë Zvicër