LËVIZJA KOMBËTARE PËR ÇLIRIMIN E KOSOVËS
Kryesia e Këshillit të Përgjithshëm
Zyra për informim
Selia e Kryesisë së KP-së: Rr. “Rrustem Statovci”  9,
E-mail:  lkck_kryesia@hotmail.com, lkck_zi@yahoo.com

Lidhur me nismën e shoqatave të dala nga lufta e UÇPMB-së për bojkotimin nga ana e shqiptarëve të zgjedhjeve në Serbi, për opinionin publik lëshon këtë:

Komunikatë

Edhe përkundër faktit se më herët partitë politike shqiptare në Kosovën Lindore patën bojkotuar Kushtetutën e Serbisë, tani ato bëjnë thirrje për pjesëmarrjen e shqiptarëve në zgjedhjet parlamentare në Serbi, edhe pse këto zgjedhje do të organizohen brenda kornizave të po asaj kushtetute, të cilën shqiptarët e bojkotuan, duke mos marrë pjesë në referendum. Kjo është një kundërthënie e thellë dhe krejtësisht e papajtueshme.

Më herët, kuptohet nën ndikimin dhe presionin e organizuar të faktorëve politik shqiptarë nga Kosova dhe nga politika zyrtare e Tiranës, subjektet politike të Kosovës Lindore sikur parashtruan disa kërkesa lidhur me të drejtat e tyre në kuadër të Serbisë ku hodhën një paralele me serbët e Kosovës, edhe pse mirëfilli dihet fakti, se serbët e Kosovës janë kolonë, kurse shqiptarët e atjeshëm janë autoktonë. Mirëpo, edhe ky kusht i tyre i parashtruar më herët, tani siç duket u harrua fare, sepse serbët në Kosovë jo vetëm që nuk kanë dalë në zgjedhjet e organizuara nga UNMIK-u, por ata as nuk i njohin institucionet e Kosovës.

Duke marrë pjesë në zgjedhjet parlamentare të Serbisë apo çfarëdo lloj organesh shtetërore të Serbisë populli shqiptar i asaj pjese i jep legjitimitet të plotë shtetit të Serbisë mbi atë pjesë  të tokës shqiptare. Prandaj, partitë politike shqiptare duhet të kenë kujdes për hapat që do t’i marrin dhe të mos bien viktimë e politikës ditore të faktorëve të tjerë nga Kosova apo gjetiu sepse partitë politike shqiptare në Kosovë sikur të udhëhiqeshin me parimin e realizimit të interesave tona kombëtare, ata së pari do të kërkonin që Kosova me të gjitha pjesët shqiptare nën ish Jugosllavi t’i bashkohen shtetit amë Shqipërisë dhe nuk do të angazhoheshin që të formojnë një komb të ri, i cili do t’i përçante shqiptarët, synim të cilin e ka pasur shteti i Serbisë. Ai është përpjekur vazhdimisht që para opinionit ndërkombëtar, shqiptarët e Kosovës t’i paraqesë jo si shqiptarë, por si diçka tjetër.

Prandaj, iniciativa e marrë nga shoqatat e dala nga lufta e UÇPMB-së për t’i bojkotuar këto zgjedhje është vendim i drejtë dhe duhet të përkrahet nga të gjithë faktorët shqiptar, në mënyrë që popullata e atjeshme mbi bazën e vullnetit të popullit të deklaruar më parë dhe në mbështetje të interesit të tij kombëtar, të nisë  dhe të formojë institucionet e veta paralele, të cilat në këtë fazë do të krijonin dhe piqnin kushtet për ta materializuar vullnetin dhe interesin e popullit shqiptar në këto troje për liri dhe bashkim me pjesët tjera të atdheut tonë shqiptar. Në këtë fazë ku jemi, Kosova Lindore ka nevojë të ngrejë zërin e fuqishëm për t`i kontestuar në mënyrë të hapur dhe krejt demokratike institucionet e pushtuesit serb. Jemi të bindur se  nuk është aspak e ndershme dhe e moralshme që askush nuk ka të drejtë të merr  përsipër, pavarësisht ndonjë mbështetjeje apo rekomandimi të çastit, pranimin me vullnet të shtetit pushtues të Serbisë. Prandaj, është shumë inkurajues pozicioni i drejtë politik që aktualisht kanë marrë shoqatat e dala nga lufta e UÇPMB-së. Konsiderojmë se ky pozicion është një hap i nevojshëm dhe i arsyeshëm për të ecur më tutje kah zgjidhja e plotë dhe e drejtë e kësaj çështjeje për popullin shqiptar të Kosovës Lindore, i cili është i shtypur dhe pushtuar nga Serbia.

Prishtinë                                                                     Zyra për informim
Më 11 dhjetor 2006