PARTIA DEMOKRATIKE KOMBËTARE 

KUMTESA

 Autonomia është minimumi i kërkesave të shqiptarëve të Kosovës Lindore

Gjithë ata, që më 1 dhe 2 mars të vitit 1992, i kanë buzëqeshur sinqerisht vullnetit politik të Referendumit  për Autonomia politiko-territoriale të Kosovës Lindore, nuk do të dalin në zgjedhjet parlamentare serbe të 21 janarit të vitit 2007, sepse ata nuk i kanë buzëqeshur rrejshëm flamurit kombëtar, në të kundërtën toka e Atdheut nuk do tu falë vend as për varre.

Për deri sa PDK-ja, kërkon nga spektri politik shqiptar të Kosovës Lindore,  t’i bashkohen për realizimin e iniciativës për t’i vënë themelet Autonomisë së pavarur me standarde evropiane, konform vullnetit politik të shprehur në Referendumin e 1 dhe 2 mars, të vitit 1992, disa liderë subjektesh partiake shumë shpejt në emër të anëtarësisë së tyre të ngushtë, të dalin në zgjedhjet parlamentare të Serbisë.

Si është e mundur që të njëjtit liderë, ka pesë vjet që nuk ia mundësuan shqiptarëve të Kosovës Lindore, formimin e Këshillit Kombëtar e as institucional, sepse nuk ishin unik në qëndrim të përbashkëta, ndërsa për kycjen në Trupin Koordinues dhe për të dalë në zgjedhjet parlamentare të Serbisë, e gjetën formulën e kompromisit.

PDK-ja edhe më herët ka tërhequr vërejtjen ndaj obstruksioneve të disa partive politike shqiptare, që po bëjnë me Beograd dhe Prishtinë e në fund edhe me Tiranë, për të marrë vendime pa pëlqimin e popullit, sikur ujku kur e ndjenë erën e gjakut të dashit, e harron se delet e kanë bariun pranë!

Këta politikanë mjeranë, kinse në emër të partive të mëdha, po bllokojnë proceset demokratike, të verbuar nga interesat partiake dhe individuale. Lufta për pushtet i ka bërë ata me veshë të shurdhër ndaj kërkesave legjitime të shqiptarëve për flamur, zbatim të dygjuhësisë, demilitarizimin e rajonit, largimin e xhandarmërisë, kompensimin e dëmeve të luftës si dhe krijimin e kushteve për të të zhvendosurit nga Karadaku i Preshevës, Malësia e Bujanocit dhe Medvegja. Duke mos i dëgjuar këshillat e askujt  e as duke mos i prek ndërgjegja prej njerëzve, të cilët kanë flijuar edhe më të shtrenjtën, si dhe nga ata refugjatë malësorë dhe ish ushtarë të UCPMB-së, të cilët bredhin sot nëpër rrugët e Kosovës  dhe shiten si hamall, pa status të refugjatit, liderët tanë politikë kanë vendosur ta legjitimojnë diskriminimin përmes parlamentit të Serbisë, i njohur për të gjitha të zezat e shqiptarëve që i kanë  vuajtur dje, e po i vuajnë, besa edhe sot.

Qeveria e Serbisë investon miliona euro (vetëm para disa muajve ka investuar  36  milion euro) për serbët e Kosovës në Kosovë edhe pse ndërkombëtarët ata i ruajnë si pëllumbat në kafaz. Kurse e njëjta Qeveri, nuk është e interesuar qytetarët  të Kosovës Lindore, t’ua zgjidhë kërkesat legjitime të parapara me planin dhe programin, të cilën ajo vet e hartoi.

PDK-ja, kërkon një qasje të re për zgjidhjen e çështjes së Kosovës Lindore, një qasje serioze nga ato të mëparshmet e cila duhet të jetë ndryshe nga e tanishmja. Shqiptarët e meritojnë Autonominë sepse këtë e dëshmuan me Referendum, luftë dhe zgjedhje lokale. Ata nuk janë pakicë në vendin ku jetojnë, por den baba den në tokat autoktone Iliro-Dardane, këtë e dinë të gjithë, madje edhe ndërkombëtarët. Tjetër është se a lejon Grupi i Kontaktit ndryshimin e kufijve apo jo, ne jemi autokton ku jemi.

PDK-ja e konsideron vendimin e disa partive politike për të marrë pjesë në zgjedhjet parlamentare të Serbisë, jolegjitime, të pa bazë dhe të ngutshme, ndaj kërkon nga ato të kthjellohen dhe mos të manipulojnë me ndjenjat e popullit.

Bujanoc,më                                                                          Nga kryesia e PDK-së

11.12.2006                                                                              Nexhmedin Saqipi-kryetar