Partia Demokratike Shqiptare
Dega në Bujanoc
 

 Dega e kryesisë së PDSH-së në Bujanoc në mbledhjen e saj  shqyrtoi marrëveshjen e fundit të subjekteve politike shqiptare që veprojnë në Kosovën Lindore reth daljes në zgjedhjet e 21 janarit 2007 për Kuvendin Republikan, me ç’rast pas gjith diskutimeve të kryesisë së saj lëshon këtë:

REAGIM

            Duke marrë parasysh se shqiptarët e Kosovës Lindore janë të detyruar që të përballen me disa veprime të cilat rrezikojnë seriozisht perspektivën për të mbijetuar natyrshëm si gjith popujt tjerë, me rastin e fundit ku partit politike shqiptare marrin qëndrim të përbashkët për dalje në këto zgjedhje parlamentare serbe, dega e Partisë Demokratike Shqiptare në Bujanoc konsideron se ky veprim i nxituar politik i tyre vazhdon të dëmtoj strukturën e trungut mbar shqiptar edhe ashtu të dëmtuar.

            Dega e PDSH-së në Bujanoc është e mendimit se aktiviteti politik i të gjitha subjekteve politike në Kosovën Lindore të vetmën mbështetje të veprimtarisë së vet duhet ta gjejë në standardet demokratike që i ka vendosur Bashkësia Nderkombëtare, standarde të cilat garantojnë të drejtat dhe liritë e popujve duke marrë për bazë vullnetin e popullit të shprehur në Referendumin e 1 dhe 2 Marsit të vitit 1992, për autonomi politiko- teritoriale me të drejtë bashkimi me Kosovën ku si organizatorë të tij ishin po këto subjekte që tani marrin guximin për të dalë në zgjedhjet parlamentare serbe e që në fakt dëmtojnë seriozisht vullnetin e popullit të tyre.

            Dega e PDSH-së në Bujanoc vlerëson që subjektet politike duhet t’i ken parasysh veprimet e pakontrolluara të forcave të uniformuara serbe me rastin e vrasjes të një fëmiu shqiptar në kufi me Maqedoninë dhe shum raste tjera para dhe pas këtij rasti makabër, luftën e ish UÇPMB-së, cungimi i të drejtave elementare në të gjitha sferat e jetës, raste këto të cilat nxorrën Platformën Politike në të cilën parashihej integrimi i këtij rajoni në Kosovë.

            Në kohën kur si popull po hyjmë në një fazë të rëndësishme historike të përcaktimit të subjektivitetit politik të popullit tonë, kur i tërë rajoni i Ballkanit Perendimor synon përshpejtimin në rjedhat e integrimeve Euroatlantike, dega e

PDSH-së në Bujanoc, është e mendimit se i tërë kapaciteti i jonë duhet të fokusohet në bindjen e Bashkësisë Ndërkombëtare se ardhmëria jonë është integrimi në Kosovë dhe jo deintegrimi i trungut shqiptar që legjitimohet me veprime të papërgjegjshme të disa liderëvë të subjekteve politike shqiptare të Kosovës Lindore.

            Dega e PDSH-së në Bujanoc konsideron se subjektet politike të cilat i ftojnë elektoratin e tyre në këto zgjedhje, bëjnë devijim politik të tyre nga se për një të vërtetë nuk ekzistojnë shum bindje: në njërën anë të ftohet elektorati për bojkot të referendumit e në anën tjetër të bëhet thirje për zgjedhje parlamentare serbe, pra të pranohet ajo kushtetutë e devalvuar e Serbisë që paraprakisht e tërë popullata shqiptare e këtij rajoni nuk e votoi, përndryshe ata të cilët të vërtetën nuk e thonë sot, nesër do të jenë të gjykuar nga populli për gënjeshtarë. 

            Dega e PDSH-së në Bujanoc fton kryesinë qendrore të sajë që të tërheq qëndrimin e sajë për zgjedhje dhe të dëshmoj se ka qenë është dhe do të jetë prapa qëndrimeve dhe kërkesave legjitime të popullatës së Kosovës Lindore, të dëshmuar sidomos në Referendumin e 1 dhe 2 Marsit të vitit 1992 dhe të 14 janarit të po këtij viti me rastin e aprovimit të Platformës Politike nga këshilltarët e tri kuvendeve komunale të Preshevës, Bujanocit dhe të Medvegjës.

Në Bujanoc                                    Kryesia e degës së PDSH-së në Bujanoc
Më 12.12.2006                                           Kryetari: Sali Salihu