PARTIA PËR VEPRIM DEMOKRATIK

17523 Preshevë, R. Sadiku 3
tel/fax: 017/660-086
16.03.2006
P r e sh e v ë

DEKLARATË E KRYETARIT TË PVD-së

            Pezullimi i pjesëmarrjes së përfaqësuesëve të LPD-së në punën e Trupit koordinues është çështje që kjo parti në mënyrë autonome e ka vendosur. Deri më tani nuk ka pasur ndonjë konsultim ndërpartiak lidhur me këtë temë.

            Natyrisht, në kuadër të PVD-së rregullisht është përcjellur puna e Trupit Koordinues dhe realizimi i programit të dy qeverive për Luginën e Preshevës, që është i përkrahur nga faktori ndërkombëtar.

            Në maj të vitit 2004 për aktivitetet e tri viteve të para unë i kam njoftuar të gjitha Ambasadat e shteteve që në mënyrë aktive janë të kyçur në zgjidhjen e problemeve në rajonin tonë. Në këtë analizë kam konstatuar se ky program ishte realizuar vetëm pjesërisht dhe se kishin ngelur shumë çështje të ndieshme të pazgjidhura.

            Mirëpo, gjatë vitit 2004 ne kishim periudhë kur qeveria e re gadi e kishte ngrirë aktivitetin e Trupit Koordinues dhe kishte bllokuar zgjidhjen e të gjitha problemeve të hapura.

            Në këto rrethana ne si PVD në vitin e kaluar e përkrahëm riaktivizimin dhe riorganizimin e Trupit Koordinues që ishte i mbështetur nga faktori ndërkombëtar.

            Gjithësesi ishte interes vital i shqiptarëve në Luginë të Preshevës që në vend të përfaqësuesëve ushtarak dhe policor, që mbisundonin në strukturën e Trupit Koordinues, të kyçen përfaqësuesit e lartë të ministrive që janë me rëndësi jetike për zhvillimin e rajonit tonë.

Gjithashtu ishte me rëndësi që me këtë rast u kyçën përfaqësuesit e pushteteve lokale, për t’i përcaktuar prioritetet e punës së Trupit Koordinues dhe për të punuar së bashku me donatorët ndërkombëtar she strukturat qeveritare në zgjidhjen e problemeve të ndieshme me të cilat po ballafaqohet popullata e jonë.

            Të gjithë e kemi të qartë se riaktivizimi dhe rekonstruimi i Trupit Koordinues u bë pas insistimeve dhe kërkesave kategorike të faktorit ndërkombëtar sepse kjo ishte forma e vetme që qeveria e Beogradit t’i plotësojë obligimet ndërkombëtare dhe ta realizojë programin e vitit 2001 për zgjidhjen e krizës në Luginë të Preshevës.

            Gjithashtu është e njohur se në qeverinë aktuale ende janë shumë të fortë elementet të cilat kundërshtojnë çfardo programi të veçantë për Luginën e Preshevës, e posaçërisht janë kundër angazhimit të faktorit ndërkombëtar në zgjidhjen e problemeve të ndieshme në rajonin tonë. Gjithësesi këto struktura shtetërore me mjeshtri e shfrytëzuan bojkotin e disa subjekteve politike shqiptare në drejtim të bllokimit të punës së Trupit Koordinues.

            Në këtë drejtim posaçërisht u shfrytëzuan çrregullimet në funksionimin e pushtetit lokal në Preshevë në vitin e kaluar, të cilat drejtpërdrejtë i ndihmoi Ministria e pushtetit lokal me heshtjen e saj perfide.

            Në këto rrethana edhe përskaj interesimit të madh të Ambasadave të SHBA-së, Bashkimit Europian dhe të OSBE-së, madje edhe të aktivitetit të dendur të disa grupeve koordinuese dhe të përfaqësuesëve të pushteteve lokale, megjithatë nuk u realizuan shumë projekte që kanë rëndësi jetike për shqiptarët në Luginë të Preshevës, por edhe për tërë popullatën e rajonit. Në radhë të parë këtu e kam fjalën për projektet e maternitetit, fakultetit të mësuesisë, të kalimeve kufitare, të rrugës Preshevë-Gjilan, të Shtëpisë së Kulturës, por edhe çështje tjera të ndieshme të fushës së arsimit, kulturës, shëndetësisë, e posaçërisht të zhvillimit ekonomik.

            Gjithësesi se në PVD do të vazhdojë të rishqyrtohet puna e Trupit Koordinues dhe raporti i jonë i mëtejmë ndaj kësaj strukture qeveritare.

            Aktualisht në komunë të Preshevës, pas revokimit të kryetarit të komunës, bashkëpunimin në kuadër të Trupit Koordinues e kanë përfaqësuesit e Koalicionit, PDSH, LPD dhe BDL, mirëpo është e qartë se përfaqësuesit e PVD-së këtë bashkëpunim e kanë në Bujanovc dhe Medvegjë.

            Gjithësesi që duhet të bëhen të gjitha presionet që Trupi Koordinues definitivisht të fillojë t’i realizojë synimet themelore të parashtruara në deklaratën e marsit të vitit të kaluar, të nënshkruar në prezencë të përfaqësuesëve të Ambasadave të SHBA-së, BE-së dhe OSBE-së.

            Në këtë drejtim është e domosdoshme që kjo problematikë urgjentisht të shqyrtohet në të njejtin nivel në të cilin është nënshkruar, e që nënkupton konsultimin paraprak edhe me faktorin ndërkombëtar. Natyrisht se të gjitha subjektet politike, e mbi të gjitha tubimi i këshilltarëve shqiptarë të Luginës së preshevës, është e domosdoshme që ta analizojnë situatën aktuale dhe të marrin qëndrime për modalitetet e veprimit të mëtejmë jo vetëm në kuadër të strukturave të Trupit Koordinues por edhe në strukturat e pushtetit lokal, e natyrisht ishin dashur definitivisht të përcaktohen edhe lidhur me çështjen e ndieshme të Këshillit Nacional.

KRYETARI I PVD-së

Riza HALIMI