PARTIA PËR VEPRIM DEMOKRATIK
17523 Preshevë, R. Sadiku 3
tel/fax: 660-086
19.08.2006
P r e sh e v ë

Deklaratë e kryetarit të PVD-së

            Para 16 vitesh pikërisht në këtë ditë 19 gusht, shqiptarët ë Preshevës dhe Bujanocit, e një muaj më vonë edhe shqiptarët e Medvegjës u tubuan masovikisht për të përkrahur programin e PVD-së.

Në këtë mënyr u themelua organizimi i parë i pavarur politik i shqiptarëve në Luginë të Preshevës, i cili së bashku me subjektet tjera politike që u krijuan më vonë u ballafaqua me sfidat jetësore që në këtë periudhë ishin të rënda dhe seriozisht rrezikonin substancën kombëtare në këto treva etnike shqiptare.

         Orientimet themelore programore të PVD-së për ndërprerjen e diskriminimit shtetëror ndaj popullatës shqiptare dhe realizimi i të drejtave individuale dhe kolektive janë gjithnjë aktuale edhe pas 16 viteve të  punës dhe sakrificave të një numri shumë të madh të veprimtarëve të PVD-së.

Pikërisht ky fakt dëshmon arsyeshmërinë e organizimit të pavarur politik, posaçërisht kur dihet se shqiptarët e Luginës së Preshevës u detyruan edhe me armë në dorë t’i kundërvihen dhunës së regjimit satrap të Millosheviqit, mirëpor edhe pas marrëveshjes paqësore edhe përskaj  ndihmës ndërkombëtare, programi qeveritar për zgjidhjen e krizës në Luginë të Preshevës gjer më tani fare pak është realizuar.

Kjo mjerisht ndodhë për faktin e njohur se edhe më tutje në strukturat shtetrore në Serbi janë shumë aktive forcat e regjimit të mëparshëm, të cilat kanë qëndrime restriktive ndaj pakicave nacionale e posaçërisht janë të ngarkuara me hipotekat e projekteve shoveniste të shekullit XIX kur janë në pyetje shqiptarët.

Në kohën kur është në përshpejtim definimi i statusit të Kosovës, qeveria aktuale serbe po mundohet që gjithnjë e më tepër ta margjinalizoj çështjen e shqiptarëve në Luginë të Preshevës me anë të përçarjeve dhe krijimit të gjendjes kaotike brenda spektrit politik shqiptar. Gjithashtu edhe kjo qeveri po e vazhdon diskriminimin ndaj shqiptarëve, jo vetëm me bllokadat ndaj procesit të realizimit të programit qeveritar por edhe me eliminimin e subjekteve ekonomike shqiptare nga procesi i privatizimit, që po zhvillohet në kuadër të një procedure të dyshimt dhe joligjore ngjajshëm me manipulimet të cilat u zhvilluan me rastin e uzurpimit të monopolit nga firma e Beogradit INTERSPEED në shfrytëzim të zonës komerciale në kalimin kufitar në Preshevë.

Në këto kushte diskriminuese veprimtarët e PVD-së,  të vetmes parti shqiptare që ka shtririje në tërë rajonin, besojnë se çështja e shqiptarëve në Luginë të Preshevës më së miri mund të mbrohet me mbështetjen e organizimit të pavarur politik që në këto momente mund të bëhet me anë të konsolidimit të punës së forumit përfaqësues të përbashkët politik të shqiptarëve, Kuvendit apo Këshillit Nacional të shqiptarëve, bërthamën e të cilit e bërbëjnë këshilltarët shqiptar të kuvendeve komunale të Preshevës, Bujanocit dhe Medvegjës.

19 gusht 2006

Kryetari i PVD-së

Riza HALIMI