PARTIA DEMOKRATIKE KOMBËTARE

KUMTESA 

Pseudokoalicioni manipulativ!

“Është e mjerueshme, madje trishtuese “kampanja” e Koalicionit të Shqiptarëve të Luginës së Preshevës, e cila nëpër tubimet elektorale mezi arrin t’i grumbullojë dhjetë qytetarë e si mendon për dy deputetë të sigurojë jo më pak se 30 mijë votues”, thuhet mes tjerash në kumtesën e Partisë Demokratike Kombëtare.

Sa më afër zgjedhjeve parlamentare të Serbisë, aq më shumë po e kaplon shqetësimi Koalicionin e vetëshpallur të Shqiptarëve të Luginës së Preshevës, i cili edhe ashtu po çalon duke kalamendur mbi dy këmbë të pasigurta.

Paramendoni nëpër tubimet elektorale të prira nga vetëm dy partnerë të Koalicionit të cunguar PVD-BDL, ku marrin pjesë kryetari i partisë më të madhe në rajon, prefekti i komunës së Bujanocit, kryetari i Këshillit për të Drejtat e Njeriut, kandidat i mundshëm për deputet e zyrtarë të tjerë të gjenden karshi një grumbulli të vogël njerëzish.

Nëpër tubimet elektorale që fillojnë me nderim dëshmorëve të kombit e të stolisura me parulla e porosi: “të bashkuar kështu e bojkoti ashtu”, me flamuj kombëtarë e fjalime patriotike, përshquhet atmosfera e zymtë e fushatës parazgjedhore. Është e mjerueshme, madje trishtuese “kampanja” e Koalicionit të Shqiptarëve të Luginës së Preshevës, e cila nëpër tubimet elektorale mezi arrin t’i grumbullojë dhjetë qytetarë e si mendon ky Koalicion t’i sigurojë jo më pak se 30 mijë votues për dy ulëse në Parlamentin e Serbisë?!.

Është qesharake deklarata e disa zyrtarëve të Koalicionit se Qeveria i ka penguar dhe po i pengon në aktivitetet parazgjedhore. Absurd. Qeveria ka ndarë mjete deri në tre milion dinarë vetëm për Koalicionin, për mbarëvajtjen e zgjedhjeve, pastaj përkundër akuzës së radikalëve ua ka pranuar Listën me 3100 nënshkrime, bile në tubime ua ka mundësuar ta përdorin edhe flamurin kombëtar, për të cilin para një muaji e gjysmë me rastin e festive kombëtare për përdorim ilegal të flamurit do t’i nxjerr në gjyq.

Mos ta kritikojnë, gjithaq, drejtuesit e Koalicionit Qeverinë sepse ajo me siguri do t’ua mundësojë mbushjen e kutive me vota, për të mos dalë të koritur nga kjo valle skandaloze.

Nëpër tubime zihen në gojë edhe akuzat se bojkoti do të thotë luftë kundër ndërkombëtarëve. Jo, ndërkombëtarët duhet ta respektojnë shumicën e shumica dihet se nga është.

Koalicionin e Shqiptarëve të Luginës së Preshevës është dashur ta përbënin 7 parti politike, pesë prej tyre të regjistruara. Nga 8 subjekte vetëm dy kanë mbetur nga shpërbërja e Koalicionit PVD-BDL, kundrejt PDSH-LPD-PDK-LDI-LKSH dhe tri shoqatat joqeveritare dy shoqatat e dala nga lufta  e UCPMB-së dhe VATRA. Llogaritja është e thjeshtë. Shumica është për bojkot, por Pseudokoalicioni manipulativ, po mundohet ta bind faktorin ndërkombëtar dhe elektoratin se ata e kanë me të drejtë. Por, elektorati di kur I thotë “Po” e di kur thotë “Jo”.

“PO” i tha referendumit të 1 dhe 2 marsit 1992, për Autonomi politiko-territoriale dhe i tha “JO” referendumit kushtetues të Serbisë dhe kështu do të veprojë edhe me zgjedhjet parlamentare të Serbisë.

PDK, fton elektoratin të mos u bindet disa partive politike për të dalë në zgjedhje parlamentare sepse do të bie ndesh votës së tyre kundër kushtetutës së Serbisë.

PDK, reagon ashpër ndaj obstruksioneve të disa partive politike shqiptare, që po bëjnë me Beogradin dhe Prishtinë, për ta hutuar elektoratin rreth zgjedhjeve parlamentare të Serbisë.

PDK, fton spektrin politik shqiptar të Kosovës Lindore t’i bashkohet për realizimin e iniciativës për t’i vënë themelet Autonomisë së rajonit tonë, konform  vullnetit politik të shprehur në Referendumin e 1 dhe 2 mars, të vitit 1992.

Bujanoc,                                                   më 09.01.2007
NGA KRYESIA E PDK                             Nexhmedin Saqipi – kryetar

nexhas@hotmail.com