Partia Demokratike Kombëtare

Kumtesa

Kosova Lindore në periferi të zhvillimeve diplomatike

Në qarqet diplomatike, kohëve të fundit, rajoni i Preshevës, Bujanocit dhe Medvegjës, përkatësisht Kosova Lindore, as që po përmendet për së gjalli, bile as krahasohet më me Mitrovicën e Kosovës.
Në kancelaritë e këtyre diplomacive, nuk po arrijnë promemorie, platforma e shkresa të ndryshme të subjekteve politike, që veprojnë në Kosovën Lindore, për avancimin e pozitës politike të shqiptarëve të këtij rajoni.
Gjithçka po duket së në Kosovën Lindore ka rënë në gjumin veror. Ky opium po vjen në momentet më kyçe kur Kosova pa pjesën e saj lindore po shkon sigurt drejt pavarësisë. Qytetarët me shqetësim pyesin: E ku po mbetemi ne? Për çka luftuam? Çka fitojmë po mbetëm edhe më tej provincë e Serbisë? Pse lufta për pushtet lokal na ka rrasur dy këmbët me një këpucë? Kush janë ata “sokola”, që në emër të patriotizmit rrahin gjoks për Kosovë e Serbi?
Të gjitha këto pyetje kanë një emërues të përbashkët: varfëria politike ka sjellë vendin para një mungese vizionesh, iniciativash, kërkesash. As nuk do të ketë kërkesa serioze për zgjidhjen e drejtë dhe të qëndrueshme të statusit politik të Kosovës Lindore.
Paria jonë a nuk na premtoi se pas zgjedhjeve parlamentare serbe, deputeti ynë do t’na rregulloj simbolet kombëtare, zyrtarizimin e gjuhës shqipe, madje do t’na largojë edhe xhandarmërinë.
Lëre që premtime ngelën në nivel pallavrash e kerefekesh, por tashti forcat e sigurimit serbë edhe më shumë janë shtuar e madje xhandarmëria në aksionet e saj, as që po i pyet autoritetet vendore.
Kurkush askë më nuk e pyet. Nuk kemi Këshill Kombëtar, i cili do t’i bashkoj krerët e lëvizjeve politike shqiptare e angazhimet për kolltuqe në pushtet lokal kanë kaluar çdo kufi. Shqiptarët janë ndarë e janë përçarë. Lokalizmat kanë marrë hov dhe po i sjellin shoqërisë sonë telashe të reja.

Protesta e organizuar nga OVL-së të UCPMB-së në bashkëpunim me subjektet politike PDSH, LPD, LKSH, PDK, UDSH, ishte shprehja e pakënaqësisë së qytetarëve me situatën momentale politike, ekonomike dhe të sigurisë. Protesta u mbajt në frymën e tolerancës dhe qetësisë, dhe kjo është një argument se Ushtarët e lirisë shumë ma mirë e kanë kuptuar situatën e përgjithshme se sa disa subjekte politike të cilët me radikalizmin e tyre politik e primitiv janë duke ia humbur imazhin edhe vet botës demokratike.

Iniciativa e Partisë Demokratike Kombëtare për Autonomi ka hasur në veshë të shurdhër. PDK ka kritikuar pushtetin lokal në Bujanoc dhe Preshevë, sepse udhëheqësit, për shkak të inateve dhe mospajtimeve rreth ndarjes së pushtetit lokal kanë lënë anash interesat shoqërore dhe kombëtare. PDK mbron qëndrimin se vetëm Autonomja e pavarur e Kosovës Lindore mund ta stabilizoj rajonin, dhe për këtë , ajo "kërkon mbështetjen e iniciativës për ta shpallur Kosovën Lindore Autonomi të pavarur konform vullnetit të popullit të shprehur me Referendum, më 1 dhe 2 mars të vitit 1992".

PDK- ja kërkon nga faktorët relevantë ndërkombëtarë që ta monitorojnë si duhet procesin e reformave në këtë rajon, sepse përndryshe situate shumë lehtë do të dalë nga kontrolli dhe Kosova Lindore sërish do të kthehet në një zonë që prodhon konflikte dhe jostabilitet, njofton Qendra për Informim e Partisë Demokratike Kombëtare, me seli në Bujanoc.


Bujanoc, 16.06.2007