Partia për Veprim Demokratik
17523 Preshevë, R. Sadiku 3
tel/fax: 017/660-086
e-mail: riza_halimi@yahoo.com
16.07.2007
P r e sh e v ë

D E K L A R A T Ë
e Kryetarit të PVD-se dhe deputetit në parlamentin e Serbisë

Projektrezoluta për Kosovën e paraqitur nga qeveria serbe është e papranueshme për Partinë për Veprim Demokratik dhe për Koalicionin e Shqiptarëve të Luginës së Preshevës sepse me formulimet e saj ofrohet vazhdim i politikës së gjertanishme jorealiste ndaj Kosovës të udhëhequr nga qeveria e mëparshme.
Refuzimi i propozimit të Marti Ahtisarit, tentimi për t’i zhvlerësuar në tërësi rezultatet e procesit të udhëhequr nga përfaqësuesi special i Sekretarit gjeneral të OKB-së si dhe insisitimi në negociata të reja të pakufizuara, janë karakteristikat themelore të kësaj rezolute të qeverisë së re serbe.
Gjithashtu, janë plotësisht të papranueshme paralajmërimet për konfrontime të reja me Bashkësinë Ndërkombëtare lidhur me statusin e Kosovës në pikën 6. të projektrezolutës, që drejtpërdrejtë rrezikojnë prolongimin e mëtejshëm të procesit të integrimeve europiane të Serbisë.
Në të njejtën kohë kjo qeveri, duke udhëhequr politikë joparimore, nuk tregon gadishmëri për qasje serioze në zgjidhjen e problemeve të pakicave nacionale, e posaçërisht nuk tregon interesim për realizimin e të drejtave të shqiptarëve në Luginë të Preshevës të cilët po vazhdojnë të mbeten në pozitë të palakmueshme.
Madje, në kushte të bllokimit të Trupit Koordinues për Bujanoc, Preshevë dhe Medvegjë dhe mosrealizimit të programit qeveritar në sferën ekonomike dhe në integrimin e shqiptarëve në strukturat shtetërore, qeveria serbe gjithnjë e më tepër po orientohet në sforcimin e komponentës militare dhe ruajtjen e qetësisë kryesisht me anë të forcave speciale të policisë!
Ky orientim anticivilizues u rikonfirmua edhe nga ministrat aktual të policisë dhe të mbrojtjes, të ciltë, me rastin e vizitës në Zonën e Sigurisë Tokësore, lidhur me shqetësimet e popullatës vendore, nuk e panë të rrugës të bisedojnë me përfaqësuesit e tyre legjitim por iu mjaftuan vetëm akuzat dhe diskualifikimet arrogante të paraqitura nga komandanti i xhandarmerisë në llogari të udhëheqësve politik dhe të pushtetit lokal të Luginës së Preshevës.
Me këtë rast ministrat e forcës në qeverinë aktuale nuk e panë të rrugës të shqyrtojnë incidentet që po i shkaktojnë formacionet e xhandarmerisë me rastin e kontrollimit vullgar të komunikacionit nëpër vendbanime shqiptare, e posaçërisht me rastin e bastisjeve të shtëpive të shqiptarëve me metoda të vrazhda që rrallë përdoren edhe gjatë gjendjeve të jashtëzakonshme. Gjithashtu nuk pat mundësi me këtë rast të sqarohet as involvimi i xhandarmerisë në sigurimin e monopolit antiligjor të firmës Beogradase “Interspeed” në përmbajtjet komerciale të Kalimit Kufitar në Preshevë pasi që kjo firmë monopoliste me metoda jotransparente dhe antiligjore të Ministrisë së infrastrukturës, ka filluar ndërtimin pa leje përkatëse, që përndryshe është dashur të sigurohet nga pushteti lokal në Preshevë.
Në këtë mënyrë edhe në kompleksin e Kalimit Kufitar në Preshevë, në përmbajtjet e të cilit nuk ka asnjë të punësuar shqiptar, shifet qartë se po vazhdon diskriminimi shtetërorë në baza etnike edhe në praktikën e qeverisë së re duke u anashkaluar afaristët vendor.
Andaj është kohë e fundit që qeveria e re urgjentisht ta rishqyrtojë punën e Trupit Koordinues dhe ta analizojë në mënyrë kritike shkallën e realizimit të programit qeveritar të vitit 2001, të përkrahur nga faktori ndërkombëtar, në mënyrë që të krijohen parakushtet e domosdoshme për sigurimin e procesit substancial me të cilin do të realizohej ky program si në aspektin e zhvillimit ekonomik, demilitarizimit të rajonit, integrimit të përshpejtuar të shqiptarëve në strukturat shtetërore, ashtu edhe në drejtim të realizimit të drejtave kolektive të shqiptarëve në Luginë të Preshevës.

Riza HALIMI,
Kryetar i Partisë për Veprim Demokratik dhe
deputet popullor në Parlamentin Republikan