Izolim apo ndarje

Shekulli 21 kishte një fillim të mbarë për shqiptarët. Shqipëria tashmë ishte demokratizuar dhe ishte e bërë anëtare e NATO-s, Kosova ishte çliruar dhe kishte shpallur pavarësinë e saj, shqiptarët në Maqedoni kishin fituar statutin e popullit shtetëformues, kurse shqiptarët Malit të Zi dhe të Luginës, të mbetur jashtë kufijve të dy shteteve shqiptare, kishin fituar një siguri më të madhe në ruajtjen e identitetit kombëtarë, qarkullim të lirë etj.

Mirëpo, fillimi i vitit 2012 solli një ndryshim, solli shumë vështirësi, sidomos për shqiptarët e Luginës.

Çfarë ndodhi?

Ata u izoluan, qarkullimi i tyre u vështirësua, u mbyllën rrugët për qarkullimin e tyre  drejt shteteve amë, drejt vizitave, takimeve me familjarët e tyre. Jo vetëm që u ndërpre qarkullimi i njerëzve, por edhe i mallrave. Shqiptarët e kësaj treve u izoluan plotësisht, u ndanë nga trungu i kompaktësisë kombëtare.

Pse?  Pse na ndanë kështu? – pyesin shqiptarët e kësaj ane. Pyesin dhe shfaqin hapur habinë, pakënaqësinë dhe brengën e tyre. Ky është një kurth i ushujzave të karpateve! – thonë ata. “S`na lënë rehat që s`na lënë”! – shprehen, duke shfaqur kështu habinë. Po çfarë bëjnë këta tanët? Si nuk i kuptojnë djallëzitë e marifetllëqet e tyre? Ata përherë kanë dashur të jemi të ndarë. Po, pse na ndajnë tanët? A janë taksat shkak i këtyr ndarjeve? A do të pasurohet Kosova nga këto taksa të këtyre pak shqiptarëve? Sa të pafat që jemi! – thonë banorët e kësaj ane.

Nëpër shuma gazeta, televizione, faqe interneti apo në mjete të tjera të informimit, shumë politikanë lokalë e opinionistë të ndryshëm kanë parqitur këtë problem, por zgjidhja nuk erdhi. Disa politikanë lokalë mendojnë se Kosova ka bërë shumë pak për shqiptarët e Luginës. Të tjerë thonë se së paku është munduar të bëjë diçka.etj

Kush po e ndihmon iden e ndarjës së shqiptarëve?

Si duket me vedije apo pavedije, vendimet që po merren në bisedimet e ashtuquajtura teknike më së shumti është duke i pësuar Lugina, është duke u ndarë edhe me shqiptarët tjerë që jetojnë në afërsi të Luginës. Këto vendime janë në dobi të atyre njerëzve që me shekuj të tërë u mundan së pari të shkatrrojnë shqiptarët, e tani dëshirojnë ti ndajnë me strategji politke, ku deri më tani kanë treguar një rezultat pozitiv dhe në një formë kanë arritur që të coptojnë trojet shqiptare dhe të zbehin afërsinë që kishim më herët.

Çfarë mund të ofrojë Lugina e izoluar për qytetarët shqiptar?

Lugina e Preshevës, nuk është një vend që mund t’ju sigurojë të ardhme, nuk është një vend ku jeta si jetë mund të jetohet, nuk  është një vend që fjala e qytetarëve dëgjohet dhe energjia pozitive shfrytëzohet. Dhe e gjithë kjo po ndodh  si pasojë e individualizmit, si pasojë e keqmenagjimit, si pasojë e një politike pa ide, dhe që nuk mund të ketë përmirësime dhe alternative për shqiptarët e këtij vendi. Dhe në realitet çfarë të pritet këtu në Luginën e Preshevës, kur në çdo moment vetëm sa shtohet izolimi, shtohet ana negative. Lugina, vendi jonë, sot për sot është duke u shkatërruar, është duke u asimiluar, është duke u shpartalluar nga varfëria, dhe kjo si duket është pasojë e izolimit, si pasojë e planeve pa ide të politikanëve shqiptar, që aprovojnë vendime në dëm të qytetarëve nga Lugina dhe i pamundësojnë lëvizjen e lirë që është jetike për ruajtjen e trojeve dhe identitetit kombëtarë.

Si duket vendi ynë po bëhet një vend ku shpresa vdes e para dhe jo e fundit siç thuhet zakonisht.

Shkruan: Fatlum Hetemi