- Zgjedhjet bëhen sipas Kushtetutës së Serbisë e cila njeh sovranitetin ndaj Kosovës dhe trevave shqiptare të komunave të Preshevës, Bujanocit dhe Medvegjës;

- Shkelet Referendumi i Marsit të vitit 1992, në kohën kur duhet bërë të kundërtën, riaktivizimin dhe rikonfirmimin e vullnetit të popullatës shumicë shqiptare të kësaj treve, dhe ngritjen e Kuvendit dhe Këshillit Nacional, për zbatimin e këtij vullneti;

- Përgjithësisht, shkelet sakrifica e popullit shqiptar për çlirimin e kësaj treve nga Serbia okupatore dhe diskriminuese në vazhdimësi; njolloset rezistenca e vazhdueshme e kësaj popullate ndaj politikave diskriminuese, ne veçanti pas ndarjes artificiale dhe të dhunshme nga Kosova dhe bashkangjitjes Serbisë, në periudhën e Luftës së Dytë Antifashiste, përkundër përcaktimit dhe inkuadrimit të shqiptarëve në luftë në krah të Aleancës së Atlantikut, mbi parimet e vetëvendosjes së popujve;

- Shkelen sakrificat e popullit shqiptar të kësaj treve përgjatë luftës çlirimtare të UÇPMB-së me forcat okupatore dhe shtypëse të Serbisë;

- Lufta e fundit çlirimtare e UÇPMB-së është ndalur me ndërhyrjen e faktorit ndërkombëtar në të mirë të zgjidhjeve paqësore dhe demokratike të drejtave nacionale dhe njerëzore të shqiptarëve të kësaj treve, me përcaktim të zbatimit të vullnetit të popullit dhe krijimit të organeve dhe institucioneve demokratike të popullit;

- Përkundër marrëveshjes së bërë (në Konçul), ka vazhduar të intensifikohet shkelja e të drejtave nacionale e njerëzore të popullatës shumicë shqiptare, nga ana e institucioneve okupatore dhe diskriminuese të Serbisë, me diktatet antidemokratike, në veçanti me militarizimin e përforcuar të kësaj treve nga forcat ushtarake-policore dhe ngritjen e bazave të reja ushtarake luftënxitëse për Kosovën dhe rajonin;

- Me hyrjen në zgjedhjet parlamentare të Serbisë, i hapet rrugë militarizimit të mëtejmë, legjitimimit të ndërhyrjes dhe akcioneve kriminale të Serbisë në të ardhmen, ndaj tokave dhe popullatës shqiptare, si në këtë treve edhe në zonat e komunave me shumicë serbe në Kosovë, mundësisë së depërtimit të forcave ushtarake e paramilitare, veprimeve gjenocidale dhe spastrimeve etnike të popullatës shqiptare, kurdoherë kur ajo t'i kërkojë të drejtat e shkelura, apo të ngrihet në mbrojtje të tyre;

- Vetëm populli është ai që duke bojkotuar këto zgjedhje dhe duke qenë i bashkuar në mbrojtje të parimeve dhe të drejtave të veta nacionale, demokratike e njerëzore, mund ta parandalojë përsëritjen e historisë kriminale të Serbisë, një proces të rrezikshëm për ardhmërinë e kësaj treve të shqiptarëve autokton;