Opinion

Pragu natyror - justifikim apo mashtrim?

Në parlamentin serb, përfaqësuesit shqiptarë nga Lugina nuk do të shkojnë për të debatuar për politikën serbe ose për nxjerrjen e ligjeve më demokratike, se nuk ua vë veshin kush, por që të nisin ose për të rinisur bizneset private dhe të sigurojnë ndonjë pension të majmë

Shkruan: Ferid Selimi

Të dilet ose jo në zgjedhjet parlamentare të Serbisë më 21 janar të vitit 2006, nuk është më temë diskutimi. Partitë shqiptare që veprojnë në Luginë të Preshevës, daljes në zgjedhje, në mënyrë të përshpejtuar, si asnjëherë më parë i kanë dhënë dritë jeshile.Katër partitë më të mëdha, me një etapë kohore të shpejtuar u morën vesh se si do t’i ndajnë vendet në parlamentin serb. I pari i listës, si gjithnjë, i ashtuquajturi lider i asaj ane z. Riza Halimi. Kjo edhe ishte kërkesa e tij dhe e partisë që drejton.

PRIMATI

Humbja e  legjislativit e më vonë edhe e ekzekutivit (prefektit) në komunën e Preshevës, nga ana e Partisë Për Veprim Demokratik, për z. Halimi, (kryetar partie), si duket, nuk thotë gjë. Në botën demokratike, kur, ndodh një gjë e tillë, bie kryetari dhe e tërë kryesia e partisë. Kreu i PVD-së, në vend që të ofronte dorëheqje nga prijësi i Partisë dhe t’u hapte rrugë reformave dhe kuadrove të reja, ai me çdo kusht, mundohet që sërish të rimarrë primatin e liderit të Luginës, duke bartur listën e kandidatëve shqiptarë, për deputetë në parlamentin serb. Deputetët e ardhshëm që do t’i marrin votat duke lutur qytetarët, do të bëhen njerëz me emër. Ata më nuk do të jenë anonimus, por me vite të tëra në të ardhmen, do të jenë bartës të mundshëm të “politikës” në Luginë. Kështu ka ndodhur edhe më parë e pse të mos ndodhë edhe në të ardhmen.

Partitë politike janë për të vepruar e jo për të qëndruar në vend. Në emër të partive politike anonimusët dalin dhe vazhdojnë të qëndrojnë në sipërfaqe.  Në listë do të gjenden kandidatët që as nëpër mëhallat e veta nuk do të mundnin t’i siguronin votat, por, të mbështjellur nën petkun e partive politike dhe të listës së përpiluar, mbase edhe të “detyrës së shenjtë” të deputetit në Parlamentin serb (që Kosovën e konsideron si tokë të veten), do të bëhen deputetë për ta pasuruar “cirukullum vitae” të veten. Kaq, asgjë më shumë. Nuk është për t’u çuditur që PVD del në zgjedhje Parlamentare serbe. Ajo edhe më parë, (hapur në programin dhe statusin e saj) ka pranuar integritetin e shtetit serb. Por, Partia Demokratike Shqiptare, që nga themelimi, së pari si shoqatë e pastaj si parti, gjithmonë e ka vënë në dyshim integritetin e Serbisë (po flas për vitet 90-ta) dhe gjithnjë ka akuzuar PVD-në si aleate të partive dhe politikës serbe. PDSH (sipas udhëheqësve dhe ideatorëve të saj) pretendonte se në vete dhe pas vetes ka të gjithë patriotët më të mëdhenj shqiptarë të asaj ane. Ata, që për shumë kohë kanë luftuar për një shtet të bashkuar shqiptar, tani për një kohë shumë të shkurtër morën vendim për dalje në zgjedhjet parlamentare serbe.

BASHKIMI ME KOSOVËN NË PARLAMENTIN E SERBISË !?

Obligim dhe e drejtë qytetare është dalja në zgjedhje. Por, obligim dhe e drejtë e çdo qytetari është që të kërkojë atë që i takon. Obligim i pushtetit është që të ofrojë kushtet elementare demokratike për të gjithë qytetarët, pa dallim etnie, feje, ideologjie e race. Nëse për dalje në zgjedhje, merret justifikim pragu natyror, atëherë, shqiptarët e asaj ane nuk paskan pse të ankohen. Pushteti ua dha të drejtën e merituar. Por kur kihet parasysh numri i mundshëm i deputetëve shqiptarë nga Lugina, atëherë s’ka se si të justifikojnë veprimin a mosveprimin e tyre karshi 248 deputetëve serb.

Në Kosovë, pos pragut natyror, serbët dhe minoritetet tjera kanë të garantuara njëzet ulëse në parlament. Mundësia e tyre për të vepruar është më e madhe, ngase u është garantuar: vendi në kryesi të Parlamentit; udhëheqja me tri ministri; si dhe vende tjera udhëheqëse si nënministra e drejtorë të departameneteve nëpër ministri të ndryshme.

Me gjithë këto befinicione duke mos harruar dhe potencuar se popullata serbe edhe pse është element shtetformues, prapë se prapë kanë shprehur pakënaqësinë e tyre (mosnjohjen e shtetit të Kosovës) duke bojkotuar zgjedhjet e fundit parlamentare.

Shqiptarëve të Luginës po u ofrohet një ose dy ulëse në Parlamentin serb, ata turr e vrap kush ta zë përpara. Mbase, liderët partiak shqiptarë kanë kalkuluar me numrin e përgjithshëm të votuesve shqiptarë dhe nga ai numër kanë nxjerrë në pah numrin e mundshëm të deputetëve shqiptarë që teorikisht do të mund të ishte: katër deputetë shqiptarë nga Lugina.

Sidoqoftë, një gjë është e qartë, në parlamentin serb, përfaqësuesit shqiptarë nga Lugina nuk do të shkojnë për të debatuar për politikën serbe ose për nxjerrjen e ligjeve më demokratike, se nuk ua vë veshin kush, por që të nisin ose për të rinisur bizneset private dhe të sigurojnë ndonjë pension të majmë. Motoja unike e tyre në fushatën parazgjedhore, do të dukej përafërsisht kështu:

DUKE VOTUAR LISTËN TONË TË PËRBASHKËT PËR DEPUTETË NË PARLAMENTIN SERB, VOTONI PËR: AUTONOMINË POLITIKE TERRITORIALE TË PRESHEVËS, BUJANOCIT E MEDVEGJËS, ME TË DREJTË BASHKIMI ME KOSOVËN!?