Opinion

Veprimet pas zgjedhjeve të bojkotuara!!!

Shkruan: Blerim N. Krasniqi

I

Bojkotimi i kushtetutës apo mos njohja e ligjit themeltar të një shteti, të prijashton nga të gjitha institucionet publike, pasi ato udhëhiqen nga ai legjislacion i cili del nga ajo kushtetutë.Në këso rrethana, shqiptarët e Luginës nuk kanë zgjidhje tjetër, përpos ti kthehen fakteve të krijuara këto 16 vitet e fundit.  Referendumi për Autonomi, lufta e UÇPMB-së, si tendencë për realizim të atij synimi, bojkotimi i kushtetutës dhe zgjedhjeve, janë tregues të mjaftueshëm se çfarë hapa duhet ndërmarr. Sa më parë duhet filluar hartimin e një kushtetute të përkohshme për Luginën dhe të shpallet si Territor Autonom me monitorim ndërkombëtar, me fazë kalimtare prej 5 vjetëve. Pastaj të mbahet edhe një referendum për shprehje të vullnetit të popullatës, për të vendosur se çfarë statusi do të ketë ai territori.ështimi i Serbisë për ti përmbushur premtimet dhe obligimet e marra gjatë bisedimeve në vitin 2001 ndaj shqiptarëve të Luginës për integrimin e tyre, janë fakte të mjaftueshme për ta ndëshkuar. Obligimet e marra dhe mos realizimi i tyre duhet ndëshkuar, përndryshe kjo situatë vazhdon deri në pakufi ose deri në asimilimin apo shpërnguljen e shqiptarëve nga Lugina e Preshevës. 

II

Pika më kritike në këtë situatë, nuk janë zgjedhjet, por si të veprohet pas tyre. Tensionet që do të ngrihen pas zgjedhjeve në Serbi, është pakoja e Ahtisarit, i cili do të bëjë publik mendimin e tij rreth zgjidhjes së statusit të Kosovës. Po ti shtohet edhe problemi i Luginës së Preshevës këtij komplikimi, atëherë situata bëhet e paparashikuar.Dalja apo mos dalja e Luginës në zgjedhje, nuk ndryshon asgjë në rajon. Me dalje, Serbia fiton përkrahje nga komuniteti ndërkombëtar për respektimin e minoriteteve dhe emërohen një apo dy deputet shqiptar në parlamentin serb, të cilët do të betohen mbi kushtetutën serbe që thotë “..Kosova dhe Metohija është tokë e shenjt e Serbisë..”Mos dalja në zgjedhje shkon në favor të aspiratës së shqiptarëve. Në momentin kur e kuptojnë se janë divorcuar definitivisht nga Serbia, atëherë duhet të marrin hapat në bazë të rrethanave të krijuara. 

III

Mbështetja e shtetit amë dhe të gjitha strukturave udhëheqëse të Kosovës për politikanët e interesuar të Luginës që të dalin në zgjedhjet serbe, ka qenë shërbimi më destruktiv që mund të bëhet. Përkrahjet e dhëna sjellin në dyshim apo edhe zhvleftësojnë në tërësi gjithë angazhimin e njerëzve që kanë dhënë në vazhdimësi për tu bashkuar me Kosovën dhe trungun shqiptar. Këto përkrahje kanë qenë poshtërim për popullatën e Luginës. Shteti shqiptar dhe Kosova, mjafton që në kuvendet e tyre të themelojnë komisionet për shqiptarët jashtë kufijve, për të ndarë buxhet dhe ti ndihmojnë çdo vit me nga 500 abetare, me ndërtimin e një spitali dhe një universiteti në gjuhën shqipe. Shteti shqiptar, si përfaqësues të vetin e ka ambasadorin në Beograd dhe nuk i duhet ndonjë deputet shqiptar në kuvendin serb.Kosova është në pozitë më të volitshme se Shqipëria, pasi këto zgjedhje organizohen ende pa ndonjë pengesë në tërë territorin e Kosovës dhe përkrahësit e zgjedhjeve serbe mund të dalin në votime.Në zgjedhje mjafton të dalë populli serb, pasi edhe ashtu janë të tyre.  

IV

Ndërkombëtarët kërkojnë stabilitet, në fakt kjo gjendje është një status-quo e dëmshme dhe shtyrje e problemit pa ndonjë afat të caktuar. Ndërkombëtarët përkrahin edhe vullnetin e popullit edhe stabilitetin. Në Luginë, këto dy terme nuk janë në harmoni. Vullneti i popullit është për bashkim me Kosovën, ku me bojkotimin e kushtetutës serbe para tre muajve dëshmuan edhe njëherë vazhdimësinë e bindjes së konfirmuar në referendumin e ’92-ës dhe luftës së UÇPMB-së. Stabilitet me problem të pazgjidhur është durim deri në një moment të volitshëm për të shpërthyer.Për bojkotimin e kushtetutës nuk u bë asnjë vërejtje dhe nuk u kritikua as nga ndërkombëtarët, as nga Kosova e as nga Shqipëria. Bojkotimi u bë në mënyrë kompakte nga shqiptarët. Ai veprim, në mënyrë të heshtur, u përkrah nga të gjithë. Askush nuk bëri vërejtje.Në rastin e zgjedhjeve që do të mbahen, dy parti politike nga Lugina e thyen këtë kompaktësi dhe u krijua hapësira për të shprehur shumëkush dëshirat e veta. Edhe tani, po të bojkotohen zgjedhjet në mënyrë kompakte, sigurisht që ndërkombëtarët dhe faktorët tjerë do ta respektojnë vullnetin e popullit. 

V

Zgjedhjet, si akt ku votuesit përcaktojnë përfaqësuesit e vullnetit të tyre, ka dy kuptime: a) pajtohen me shtetin dhe sistemin tij dhe b) delegojnë vullnetin tek përfaqësuesi.Në Luginë të Preshevës, dy parti politike shqiptare kanë shprehur interesim për të dalë në zgjedhjet serbe, të cilat kanë dalë si rrjedhojë e kushtetutës më të re të aprovuar para tre muajve. Këto parti, së bashku me të tjerat kanë bojkotuar ligjin themelor të shtetit serb.  Këto zgjedhjeve serbe do të jenë një sfidë për shqiptarët si votues dhe për partitë e interesuara për legjitimim. Përfundimi i tyre, do të tregoj orientimin dhe dëshirën e popullatës dhe partive politike. 

VI

21 janari do të jetë ditë e kthesave apo vazhdim i gjendjes së vjetër. Për atë vendos populli, i cili në momentin e daljes tek kutia e votimit, faji do të jetë individual, e jo kolektiv, por pasojat do të jenë kolektive. Çdo kush ka të drejtën e shprehjes së mendimit përmes fjalës dhe  përmes votës. Kthesat janë përplot me sfida dhe të panjohura. E vjetra nuk ndryshon prej ditës së sotshme dhe atyre që kanë kaluar, të cilat i njohim.  Gjërat që i kërkon, gjithmonë një herë i vije mundësia për tu bërë realitet. Kjo është mundësia për shkëputje nga Serbia, të cilën e kemi kërkuar rregullisht.Ky bojkotim do të tërheq vëmendjen e bashkësisë ndërkombëtare, për t’u rimarrur me problemin e Luginës, pasi nuk është bërë zgjidhje me ndërmjetësimin e tyre në vitin 2001.

(Shkrimi është botuar edhe në të përditshmen Express)