Partia për Veprim Demokratik
17523 Preshevë, R. Sadiku 3
tel/fax: 00 381 (0)17 660 086
e-mail: riza_halimi@yahoo.com
P r e sh e v ë

R   E   A   G   I   M

            Autori i komentit “Presheva ka më afër Tiranën se Beogradin” K. Danaj, analist nga Tirana, në analizën e tij rrjedhave aktuale politike në Luginë të Preshevës sikur don të zbulojë Amerikën kur flet për faktin se shqiptarët në Luginë të Preshevës në aspektin etnik, kulturor dhe gjuhësor e kanë më afër Tiranën se Beogradin. Mirëpo, në të njejtën kohë duket se harron që kjo vlenë njësoj edhe për shqiptarët e trevave tjera etnike!

            Me siguri se është me rëndësi të diskutohet për aspiratat kombëtare të shqiptarëve por është indikative që ky koment paraqitet pikërisht para zgjedhjeve paralmentare të 21 janarit në Serbi. Madje, duke u shërbyer me shenime të pasakta nga zgjedhjet lokale të 4 qershorit, të zhvilluara poashtu në Serbi, dhe gjithashtu në bazë të ligjit serb për pushtet lokal.

            Megjithëse i kamufluar me patriotizëm folklorik, shumë transparent del qëllimi kryesor i komentit i cili synon ta kompromitojë pjesëmarrjen e shqiptarëve të Luginës së Preshevës në zgjedhjet parlamentare në Serbi duke u shërbyer edhe me “sondazhe” inekzistente sipas të cilave autori, të cilit i mugojnë edhe informatat themelore, merr guximin të prognozojë se shqiptarët në Luginë do t’i bojkotonë këto zgjedhje sikur e bojkotuan referendumin për kushtetutën e Serbisë!

            Do ta kisha informuar autorin e këtij komenti se shqiptarët e Luginës së Preshevës gjithashtu e kishin bojkotuar edhe Kushtetutën e Serbisë të vitit 1989, mirëpo, menjëherë pas këtij bojkoti, morën pjesë në zgjedhjet paralmentare të viteve 1990, 1992, 1993 dhe 1997 dhe kishin një apo dy deputetë në parlamentin e Serbisë të cilët në mënyrë të denjë i mbrojtën të drejtat e shqiptarëve të Luginës. Gjithashtu, me të njejtën kushtetutë, shqiptarët e këtij rajoni që nga viti 1992 rregullisht morën pjesë në të gjitha zgjedhjet për pushtet lokal në Serbi.

            Sikur që në vitin 1989 ishin të paknaqur me Kushtetutën e Millosheviqit, edhe kësaj radhe subjektet politike të shqiptarëve me kohë i paraqitën vërejtjet e tyre serioze projekt-kushtetutës së posaaprovuar, andaj edhe bojkoti i shqiptarëve të Luginës së Preshevës ishte rezultat i apelit të subjekteve të tyre politike.

            Ndërsa për zgjedhjet e 21 janarit katër partitë më të mëdha politike të Luginës, PVD, PDSH, LPD dhe BDL, nënshkruan më 4 dhjetor 2006 deklaratën e përbashkët me të cilën u morrën vesh të dalin në këto zgjedhje me listë të përbashkët.

            Tërheqja e mëvonshme e PDSH-së dhe LPD-së nga Koalicioni i shqiptarëve u arsyetua me problemet e pazgjidhura me të cilat ballafaqohet popullata shqiptare në rajon. Në anën tjetër, pikërisht zgjidhja e problemeve jetësore dhe lufta politike për jetë më të mirë të shqiptarëve në Luginë të Preshevës është programi zgjedhor i Koalicionit shqiptar. Dallimi i vetëm me këtë rast është në formën e realizimit të kërkesave për zgjidhjen e statusit politiko-juridik të shqiptarëve në Luginë. Gjersa PDSH me 15 këshilltarë në Kuvendin komunal të Preshevës dhe LPD me 9 këshilltarë në Kuvendin komunal të Bujanocit janë orientuar për bojkot, PVD dhe BDL me 34 këshilltarët e tyre në Kuvendet komunale të Preshevës, Bujanocit dhe Medvegjës kanë zgjedhur formën aktive të veprimit politik. Nga shenimet për numrin e këshilltarëve shqiptarë në tri Kuvendet komunale të Luginës së Preshevës shifet qartë edhe raporti i forcave zgjedhore në mes të atyre që po vazhdojnë aktivitetin zgjedhor në kuadër të Koalicionit të shqiptarëve të Luginës dhe atyre që u larguan nga ky Koalicion. Po e potencoj këtë fakt sepse, i painformuar mirë, autori i komentit paraqet shenime jokomplete me të cilat lexuesit mund të krijojnë përfytyrim të gabuar lidhur me forcën zgjedhore të subjekteve politike në Luginë të dalur nga zgjedhjet e fundit lokale.

            Është e sakt se Ragmi Mustafa në zgjedhjet lokale të organizuara në Serbi më 4 qershor 2006 i mori 64% të votave, mirëpo, për hir të objektivitetit, duhet shtuar se ai me këtë rast kishte rreth 4.000 vota nga 30.000 zgjedhës, sa i ka komuna e Preshevës, d.m.th. u bë kryetar komune me vetëm 13% të elektoratit preshevar. Ndërsa në të njejtën kohë në Bujanoc në rrethin e parë kandidati i parë ishte Nagip Arifi i PVD-së me 6.700 vota, kurse Jonuz Musliu i LPD-së i siguroi 4.200 vota.

            Me gjithë lëshimet që janë paraqitur në komentin e K. Danajt, që me siguri janë pasojë e mungesës së informatave të plota, është me rëndësi që një analist nga Tirana ka vendosur të analizojë rrjedhat politike edhe në Luginë të Preshevës.

            Mirëpo, ishte dashur që çështja e pjesëmarrjes së shqiptarëve në institucionet e shteteve ku ata aktualisht jetojnë të shqyrtohen në mënyrë më komplekse dhe me kritere unike. Në atë rast ishte dashur të sqarohet se kujt i pengojnë deputetët shqiptarë të Luginës së Preshevës kur dihet se askush serioz nuk e konteston rëndësinë e deputetëve shqiptarë në parlamentin e Maqedonisë dhe të Malit të Zi.

            Gjithashtu, për hir të kompletimit të peizazhit politik në Luginë të Preshevës, do të kishat shtuar faktin se këto ditë edhe zyrtarisht është kontestuar lista zgjedhore e Koalicionit të shqiptarëve të Luginës së Preshevës nga ana e Partisë Radikale Serbe dhe nga ana e Partisë Socialiste Serbe, forcave politike që i shkaktuan të gjitha tragjeditë në ish Jugosllavi.

            Duke përfunduar këtë reagim do të kisha theksuar se partitë politike, PVD dhe PDSH, që e organizuan referendumin e 1 dhe 2 marsit 1992, e jo të 24 marsit 1992 siç paraqitet gabimisht në koment, kanë dëshmuar se i kanë gjithnjë parasyshë aspiratat kombëtare, por njëkohësisht të gjitha partitë politike shqiptare ekzistuese janë të obliguara të merren edhe me problemet ekzistenciale të shqiptarëve në Luginë, numri i të cilëve, në bazë të regjistrimit të vitit 2002, është përgjysmuar gjatë decenies së fundit.

            Pikërisht në suaza të luftës për ruajtjen e substancës kombëtare, që është seriozisht e rrezikuar, në Kuvendin e përbashkët të këshilltarëve shqiptarë të Luginës së Preshevës u aprovua më 14 janar 2006 Platforma politike me të cilën, në kushte të rrespektimit të parimeve të njohura të Grupit të Kontaktit për zgjidhjen e statusit të Kosovës, është paraparë pjesëmarrja e shqiptarëve në të gjitha institucionet shtetërore në Serbi.

            Andaj shtroj pyetjen se kujt i duhet krijimi i gjendjes kaotike pikërisht në momentet kur shqiptarët e Luginës me Koalicionin e tyre zgjedhor kanë dalur me kërkesë për zgjidhjen e statusit të tyre politiko-juridik dhe për lidhje speciale me Kosovën.

            Gjithashtu shtrohet edhe pyetja tjetër se kujt po i pengon interesimi gjithnjë e më i madh i strukturave shtetërore të Shqipërisë dhe Kosovës për t’i ndihmuar shqiptarët e Luginës së Preshevës pikërisht në kohën kur qeveria në Prishtinë madje ka paralajmëruar hapjen e Zyrës Koordinuese për Luginë.

            Kur dihet se Koalicioni i shqiptarëve për zgjedhje të 21 janarit ka përkrahje të fortë edhe të SHBA-ve, BE-së dhe OSBE-së, të cilat që nga viti 2001 janë shumë aktive në realizimin e projekteve të rëndësishme për Luginën e Preshevës, vetvetiu shtrohet pyetja se nëse nuk përfillen sygjerimet e strukturave më të larta shtetërore në Shqipëri dhe Kosovë dhe njëkohësisht refuzohen sygjerimet dhe përkrahja e miqëve më të rëndësishëm ndërkombëtarë, atëherë shtrohet pyetja se cili është projekti i propaguesëve të bojkotit me të cilin shqiptarët do të arrinin ta ruajnë substancën kombëtare në trojet e tyre etnike.

            Gjer më tani partitë politike që e lëshuan Koalicionin nuk kanë dhënë përgjigje në këto pyetje. Vetëm radikalët serbë janë të qartë, ata nuk dojnë t’i shohin deputetët në parlamentin republikan në emër të Koalicionit të shqiptarëve të Luginës së Preshevës.

Në Preshevë,                                                     KRYETARI I PVD-së
më 07.01.2007                                                      Riza HALIMI