Disa pasaktësi në komentin e z. Koço Danaj, me titull “Presheva ka më afër Tiranën se Beogradin” botuar në Presheva.com

shkruan: Ferid Selimi

Në Web faqen Presheva.com, më 7 janar të vitit 2007, lexova një koment nga Koço Danaj, (pa modesti, për mua i panjohur). Pa dashur që të polemizoj me autorin e as me dikë tjetër, për hirë të së vërtetës dhe saktësisë së informacioneve, duke u bazuar në fakte, do të mundohem që të përmirësoj autorin në disa konstatime dhe keqinformime, që si duket ia ka keqinterpretuar dikush, mbase (pa)dashtas.

Cilat janë pasaktësitë që vihen re në këtë koment?

E para: Në Luginën e Preshevës (nëse e fusim edhe Medvegjën), nuk veprojnë vetëm pesë subjekte politike shqiptare, por janë shtatë. Sa për informim, katër prej tyre kanë selinë në Preshevë, dy në Bujanoc dhe një në Medvegjë, pa përfshirë degët e disa prej këtyre partive që kanë në këto komuna.

E dyta: PDSH dhe LBD (sigurisht autori aludon në LPD) nuk janë subjektet kryesore në Luginë. Pavarësisht, vlerësimit tim për këto dy subjekte, e vërteta është se PDSH ka një shumicë të lehtë në Kuvendin Komunal të Preshevës dhe në koalicion me BDL dhe degën e LPD-së, (tashmë e ndarë nga kjo parti, duke krijuar subjekt të ri politik), kanë formuar koalicionin qeverisës në KK të Preshevës. (z. Ragmi  Mustafa, për prefekt të bashkisë së Preshevës, ka fituar 64% të votave, por PVD nuk ka marrë pjesë në ato zgjedhje, si dhe z. Mustafa ka qenë i mbështetur edhe nga LKSH, dega e ndarë nga LPD).

Në Bujanoc, ndryshojnë gjërat, PVD së bashku me LPD-në, udhëheqin me Kuvendin Komunal, ndërkaq ekzekutivin e ka PVD. PDSH, në këtë komunë nuk përfaqësohet nga asnjë këshilltar. Poashtu edhe në Medvegjë, PDSH nuk ka këshilltarë komunal, madje, sa jam i informuar (nëse jam i informuar drejt), PDSH, për 16 vjet veprimi, nuk ka arritur që në Medvegjë të themelojë degën e saj.

PVD është i vetmi subjekt politik shqiptar i Luginës që ka të themeluara degët e saj në tri komunat: Preshevë, Bujanoc e Medvegjë dhe përfaqësohet nga kandidatët e vet në të tri Kuvendet Komunale. Nëse do t’i numëronim këshilltarët e partive nëpër këto kuvende komunale, PVD, dominon ndaj të gjitha partive rivale. Andaj është i padrejtë konstatimi i z. Danaj, kur thotë se: “...Për dijeni të lexuesit, PDSH dhe LBD janë dy nga partitë kryesore të shqiptareve”.

 

E treta: Nuk qëndron as konstatimi se “...Jonuz Musliu ka qenë... kandidati kryesor për bashkinë e Bujanocit”. Z. Musliu, ishte një ndër kandidatët e mundshëm për prefekt bashkie të Bujanocit, por jo edhe kryesori. Kjo u pa nga rezultatet e votimit në rrethin e parë. Ai doli i treti në listë. Sipas autorit të këtij  komenti, del se z. Musliu, vullnetarisht e lëshoi garën për prefekt për ta mbështetur z. Arifi. E vërteta është se z. Musliu ka fituar 4000 vota (nuk e di numrin e saktë), por, i pari ka qenë z. Nagip Arifi i përcjellur nga z. Stojmenoviq. Ndërkaq, z. Jonuz Musliu ka përfunduar garën për prefekt bashkie si i treti (sipas rregullave vetëm dy të parët vazhdojnë garën në rrethin e dytë). Pasi ka përfunduar garën, z. Musliu, ka treguar pjekuri politike duke dalur hapur në mbështetje të z. Arifi, dhe duke ftuar elektoratin e tij që ta votonin z. Arifi për prefekt. Në këtë mënyrë ai kontribuoi në zgjedhjen e z. Arifi edhe për një mandat në krye të prefekturës së Bujanocit.

E katërta: Duke mos njohur rrethanat e krijuara dhe përplasjet politike që kanë ndodhur dhe janë duke ndodhur edhe më tutje në Luginën e Preshevës, z. Danaj, duke dashur t’i arsyetojë veprimet e liderëve partiakë të Luginës, akuzon politikën e Tiranës dhe të Prishtinës. Kjo shihet në konstatimin e tij të mëposhtëm: “politika në Prishtinë dhe Tiranë nuk ka lëvizur fare për t’i ndihmuar politikanët e Luginës së Preshevës të krijojnë Këshillin Kombëtar Shqiptar”. Subjektet politike shqiptare të Luginës së Preshevës, janë ato që do të duhej bartur barrën kryesore e pse jo edhe fajin për mos angazhimin e duhur në krijimin e Këshillit kombëtar. Sa u përket zgjedhjeve parlamentare serbe, si duket dikush nga  drejtuesit e subjekteve politike shqiptare, do që ta përfundojë karrierën politike në postin e deputetit, në shtetin që duke bojkotuar Referendumin për ndërrimin e Kushtetutës, vunë në dyshim pranimin e integritetit të Serbisë. Në anën tjetër nëpërmjet pjesëmarrjes në zgjedhje legjitimojnë dhe pranojnë po atë Kushtetutë ku Kosova është futur në kufijt e Serbisë.

E pesta: Lëshimi i fundit, mbase pa dashje i Z. Danaj është ai i datës së mbajtjes së Referendumit Për Autonomi Politike Territoriale Me Të Drejtë Bashkimi me Kosovën. Ai thotë: “...shqiptarët e Luginës së Preshevës në datë 24 Mars 1992 kanë zhvilluar një Referendum për Autonomi të Luginës dhe për të drejtë Bashkimi me Kosovën”. Referendumi është mbajtur më 1 dhe 2 mars të vitit 1992 e jo më 24 mars. Kjo është një datë historike dhe si e tillë do të duhej mbajtur mend, paçka që mbase nuk do të mund të jetësohet ky deklarim, si e drejtë kushtetuese e qytetarëve e garantuar me Kushtetutën e një shteti.

shënim: Fjalitë nën thonjëza janë marrë ashtu si i ka parashtruar z. Koço Danaj në komentin e tij. Ndërkaq tri pikat para ose pas na bëjnë me dije se para ose pas tyre ka edhe mendime ose fjalë tjera, që nuk kishin rëndësi për dhënien e saktësisë së informacionit. Shpresoj që autori i këtij komenti do të ketë mirëkuptim.

P.S. Me qëndrimet tjera që nuk kanë të bëjnë me këto pasaktësi, pajtohem plotësisht me z. Koço Danaj.