Reagim lidhur me zgjedhjet Parlamentare për Serbi            

Sofizmi, dinakëri e propaganduesëve për pjesëmarrje

Shkruan: Skyfter Kadriu Presheva

Arsyetimet mashtruese për dalje në zgjedhje për Serbi, jo vetëm që janë krim por edhe mutacion i pjesës së tyre të  fshehtë. Të gjithë pjesëmarrësit që me dëshirën e vet e përkrahin dhe përqafojnë Serbinë, nuk na shqetësojnë, populli i njeh, e më mirë se çdokush ata vehtëvehten. Me paturpësinë më të madhe, vetë e pranojnë se asnjë marrëveshje e deritanishme nuk është respektuar, por, përkundrazi, pjesmarrja e kuislingëve në parlament e arsyeton dhe legjitimon aparatin ushtarako-policor serb, për të gjitha masakrat, gjenocidin mbi popullatën e pafajshme dhe të pambrojtur. Të thirresh në demokraci, lirinë e mendimit e organizimit politik partiak, përfaqësimit të popullit në emër të elektoratit, inicimit të zgjidhjeve me interes kombëtar, ndryshimeve pozitive, në emër të daljes në zgjedhje si rrugë e vetme e zgjidhjes së problemeve, të jesh për kthimin e të zhvendosurve dhe kundër spastrimeve me anë të “përfaqësuesve tonë” në parlamentin përplot xhelat të etshëm për gjak shqiptari, është mashtrim ugurzi, i kobshëm, tradhëti e kulluar.

Për problemet e Rajonit Autonom të Preshevës (momentalisht), vendosë vetë populli e jo dështakët dhe servilat e çfarëdo ngjyre qofshin. Çfarë kanë bërë deri më sot, kujt i kanë dhënë llogari deri më sot, për të gjitha dështimet të cilat i argumentojnë edhe vetë, në fushatat e tyre mashtruese, me arsyetime kontradiktore e banale?

Të gjithë të përndjekurit politikë, veprimtarët e dëshmuar edhe shumica me probleme ekonomiko-sociale, të larguar me dhunë nga vendlindja, etiketohen si armiq, janë në shënjestër të politikës së re, si ajo e vjetra, jo vetëm nga regjimi por edhe nga denoncuesit, kallxuesit e vegjël, e tipave pro-zgjedhjeve per Serbi, e personave që interesat e ulëta të tyre i vënë para atyre kombëtare.Të gjithë e duam demokracinë dhe paqen, në vend e rajon, integrimet me botën, por së pari duhet të përmbushen disa parakushte elementare siç është e drejta për të jetuar, frymëmarrja dhe lëvizja e lirë që edhe sot i mungojnë popullit, për integrimin e tij me vetveten, në trevat veriore të Shqipërisë së coptuar mizorisht.

Prandaj: Jo, zgjedhjeve për Serbi, Presheva është Shqipëri!

Prishtinë, 14 janar 2007