Opinion

Organizimi i manifestimit për 16 vjetorin e Referendumit pati disa lëshime

Në këtë vështrim dua të i jap disa opinione të mia përkitazi për manifestimin e referendumit të 1-2 marsit që u organizua nga ana e dy partive politike gjegjësisht të PVD-së dhe asaj të PDSH-së. Këtij manifestimi këto dy parti i dhanë një pompozitet të madh që gjermë sot asnjëherë nuk iu është dhënë. Por, ky manifestim pati disa lëshime organizative si në aspektin moral po ashtu edhe në atë përmbajtësor. Andaj këto lëshime dëshiroj që t'i trajtoj në këtë vështrim siç vijon: 

Së pari: këto dy parti është dashur që ta dinë se referendumi nuk është pronë personale e tyre, por është pronë ekskluzive e popullatës së kësaj treve. Andaj nuk ka qenë e moralshme që vetëm këto dy parti të bëjnë organizimin e manifestimit të këtij referendumi në këtë mënyrë, sepse me këtë veprim të tyre besoj se se një masë kanë denigruar dhe popullatën e kësaj treve. 

Së dyti: unë si qytetar i kësaj treve kam qenë i indinjuar sepse janë bërë disa lëshime përmbajtsore. Kur të them këtë kam parasysh se këto dy parti këtë manifestim e bënë ndaras. Po të ishte pasur një kuptim përmbajtsor është dashur që ky manifestim të organizohet nga ana e të gjitha partive. E sic është bërë ky manifestim vec e vec nga ana e këtyre dy partive bën të kuptosh se sa larg është "Unifikimi i faktorit politik" në këtë trevë. Kurse në prononcimet e juaja kjo sintagmë përmendet rregullisht. Sa jemi të unifikuar u pa më së miri kur Kosova e shpalli pavarsinë nuk u arrit asnjë ujdi që të ftohet një seancë solemne për këtë akt madhor. 

Së treti: këto lider politik duhet ta dijnë se mu nga ana e këtyre dy partive ka ardhur deri te zhbërja e kuvendit për Autonomi territoriale Politike me të drejtë bashkimi me Kosovën. Dua të përkujtoj se në atë kohë kur duhej të zgjidhej kryetari i këtij Kuvendi shumica e antarëve të të dyja kryesive me liderët e tyre bënin "sallto mortale" duke mos pranuar asnjëri postin e kryetarit të këtij Kuvendi. Në atë kohë kur ishte rrezik që të pranohet posti i kryetarit pa kurrfarë hezitimi e pranoi z. Ibrahim Kadriu. E sot ky njeri për satisfaksion moral nuk ftohet në këso lloj manifestimi bare si mysafir nderi. Ndërsa sot kur fryejnë erërat demokratike, këta liderë mburren sikur ata të jenë udhërrëfyes të këtij Kuvendi. Jam i bindur se po të mos ishte zhbërë ky Kuvend, se dita e referendumit do të ishte manifestuar më shpesh e jo pas 16 viteve. 

Së katërti: gjëja që më shtyn të dyshoj në seriozitetin e këtyre dy partive politike që i dhanë aq peshë të madhe këtij manifestimi, jam i bindur se është bërë për shkaqe marketingu sepse me 11 maj 2008 priten të mbahen zgjedhjet lokale. Po të kishin pasur një fije konsiderate dhe po ta kishin cilësuar si një gjë sublime do ta kishin manifestuar më shpesh. Sa mbaj në mend unë, referendumi nga ana e këtyre dy partive është përmendur vetëm atherë kur janë mbajtur zgjedhjet lokale.

Me anë të këtij vështrimi nuk desha që këtyre liderëve t'ua mohoj dëshirën e tyre për organizimin e këso lloj manifestimesh, por desha t'ua bëjë me dije se nuk ka qenë mirë që ky manifestim të bëhet në këtë formë. Në fund dua të them këtyre liderëve mos të krekosen me këtë referendum se nuk keni qenë të zotët për 16 vite të realizoni asgjë përmes këtij referendumi.Andaj si porosi e imja e fundit në këtë vështrim është që në të ardhmen të gjithë liderët politik që veprojnë në Luginë të Preshevës të mblidhen dhe të bëjnë një tryezë debatuese rreth këtij referendumi, që në të ardhmen të kemi një qasje sa më përbjatësore dhe sa më unifikuese së bashku me popullin.

Miratoc, 6 mars 2008
Abdullah Bilalli, arsimtar