Opinion

Tri këshilla për Shqiptarët e Luginës!

 

Shkruan:*Bardhyl Metaj, Zürich

1. Është shumë me rëndësi pjesëmarrja e Partive politike shqiptare (si koalicion) në zgjedhjet për Parlamentin Serb. Para se gjithash, ngaqë rezultati për formimin e shumicës për Qeverisje, do të jetë shumë e ngushtë, si raport mes forcave të grupuara në dy Blloqet serbe, të themi "pro-europiane" të DS-it e LDP-së dhe atyre të Radikalëve e Koshtunicës, të mobilizuar kryesisht (gjoja) rreth luftës mitike për Kosovën!
Së këndejmi shqiptarët me dy deputet eventual, mund të arrijnë që të jenë edhe bashkë-themelues të Qeverisë me forcat "pro-europiane", si dhe të përfitojnë për herë të parë, me pjesëmarrjen në Ekzekutiv përmes ndonjë Ministri apo edhe zv. ministri shqiptarë.
Të gjitha sondazhet aktuale dëshmojnë, se dy-tre deputet më shumë apo më pak për njërin bllok, kanë me vendos kush e themelon Qeverinë: "Pro-europianët" apo Radikalët!
Karshi kësaj situate apo rrethane, shqiptarët e Luginës kanë më së pakti arsye që të jenë inferiorë e të rijnë anash!
Angazhimi shtesë i Trupit Politik që përfaqëson apo do të duhej të përfaqësojë shqiptarët e Luginës karshi situatave aktuale në Serbi, por edhe në aspektin vizionar e Strategjik, është që të lidhin koalicione parimore me të gjitha Partitë e nacionaliteteve dhe ato pro-europiane rreth çështjeve parimore, të të drejtave të Pakicave, procesit të Decentralizimit, Regjionalizimit etj.
Andaj, bojkoti apo abstenimi nuk është alternativë, përkundrazi, politika pro-aktive është ajo që duhet të jetë konstantë e Partive Shqiptare në Luginë.
Lufta për konstituimin e faktorit politik shqiptar në Luginë nuk ka përfunduar, përkundrazi, ajo vetëm sa ka filluar, në konstalacionin e ri të pas shpalljes dhe njohjes ndërkombëtare të Pavarësisë së Kosovës;
Në Luginë, duhet të ngjajë ajo që po mungon, krijimi i strategjive dhe koalicioneve politike të cilat japin rezultate më të mira në planin afatshkurtër, të mesëm dhe afatgjatë; dhe atë në rrafshin Lokal e Regjional në Serbi, në rrafshin Regjional në Ballkan, dhe gjithsesi në rrafshin Kombëtare;

2. Jo se duhet dalë në zgjedhje e duhet fituar ata dy Deputet në Beograd, por Partitë politike të Luginës duhet të jenë shumë më pro-aktive, dhe ta lartësojnë kualitativisht shkallën e përfaqësimit! Kjo mund të realizohet, ta zamë, nga financat e përbashkëta partiake e të donatorëve privat, për hapjen zyrave të tyre përfaqësuese jashtë Luginës. Para se gjithash në Beograd dhe Prishtinë, por pse jo edhe në Bruksel.
Zyra në Beograd për Organin mbipartiak të Luginës (por që vlen edhe për Shkupin, kur flasim për shqiptarët e Maqedonisë!), me Deputetët si dhe dy-tre profesionist me studime të mbaruara në Perëndim është e pazëvendësueshme...dhe është imperativ! Ngase aktualisht kemi një situatë, kur ata vizitohen vetëm atëherë, kur ambasadorët e akredituar në Beograd, bëjnë vizitat e tyre rutinore!
Zyra përfaqësuese regjionale e shqiptarëve të Luginës në Beograd, përballë Ambasadave të Huaja të akredituara atje do të kishte mundësinë që të prezantoj e publikoj të gjitha çështjet e hapura politike, por edhe ato të Drejtësisë e të Ekonomisë në një nivel, kualitet e intensitet krejt tjetër prezantimi, krahasuar me përfaqësimin e prezantimin aktual. Është alternativa e vetme profesionale, karshi debateve shterpe e të pafund, në mediumet shqiptare apo çajtoret e Preshevës, Bujanovcit e Tërnovcit, por pa i harruar edhe ato të Tetovës e Gostivarit në rastin e shqiptarëve të Maqedonisë.
Përmes një përfaqësimi të tillë përfundimisht, shqiptarët e Luginës do të kishin gjithashtu mundësinë që të bëjnë Publik Relations profesionale e aktive, në mediat e huaja të shumta, të akredituara në Beograd, por edhe në vet Mediat Serbe.
Simotrat e kësaj Zyreje, natyrisht se i duhen edhe Prishtinës së hutuar me veten (lexo nën tre!)... por edhe Brukselit.
Përndryshe, ngjanë siç po ngjanë: që çështja e tyre të jetë e pezulluar, as mos të flitet e shqyrtohet, por as mos të njihet e dihet...!
Kosova deri te Pavarësia saj, erdh duke shfrytëzuar atë pak hapësirë politike e strukturale në kohën e ish Jugosllavive; fillimisht me arsimimin dhe emancipimin politik e shtetformues, me krijimin e themelimin e Universitetit, partive politike, luftën diplomatike...!
Ndoshta nuk është e parëndësishme të përmend me këtë rast, sa për ri-freskim të kujtesës historike: se edhe me 1919-1924, në Parlamentin Serbo-kroato- slloven, shqiptarët kishin Parlamentar të tyre në Beograd;
Ishte Ferat Bej Draga me vizionin dhe konstruktin e tij politik, dhe ai jo rastësisht, në histori ka hyrë si Hero dhe ndërtimtar i themeleve të shtetësisë dhe Pavarësisë që gëzojmë sot...! Pra pa frikë, ju lutem nga paranoja e prezencës në Beograd!
Bojkoti, abstenimi e indiferenca, janë tipare të dembelëve e impotentëve politik.
Programi, Strategjia, vizionet dhe e përpjekjet, ndërkaq, janë ajo çfarë dallojnë Politikat bashkëkohore nga përfituesit e Burokratët impotentë e egoman!

3. Më rastisi që ditë më parë, ta lexojë diku nga ish-kryeministri i respektuar dhe sapo kthyer në Kosovë, që si këshillë ua drejtonte shqiptarëve në Maqedoni dhe Luginë: se zyra ku duhet të drejtohen për çështjet e tyre, qenkësh Tirana!
U trishtova! Për herë të para më ngjau, që sikur të kisha mund, ta zh`bëja një thënie të tjetër kujt!
Jo. Jo! Zyra e të gjithë shqiptarëve të ish Jugosllavisë – është vetëm në Prishtinë!
Dhe ekskluzivisht në Prishtinë!
Dhe atë, Jo për arsye meskine, se Prishtina ka nevojë apo nderohet nga ky ekskluzivitet, por ngase është shumë, shumë më kompetente dhe duhet të jetë! shumë më e përkushtuar për çështjet e tyre! Ky është obligim historik, kombëtarë, moral dhe njerëzor i Prishtinës! Dhe para se gjithash i Prishtinës!

Pastaj pse ta heshtim, Prishtina dhe shqiptarët në ish-jugosllavi, kanë përvojë 95 vjeçare me atë situatën, kur zyra është në Tiranë!

Kosovarët me vëllezërit e tyre në Republikat e ish Jugosllavisë kanë për-jetimet, përvojat e njëjta dhe një rrugëtim të përbashkët të atij kalvarit të përgjakshëm - gati 100 vjeçar!
Në këtë rrugëtim, Tirana zyrtare shfaqej si në një fatamorganë: shumë, shumë rallë...çoftë edhe vetëm sa të n`dëgjojë...!




*Bardhyl S. Metaj, është analist politik dhe Kolumnist në Gazetën „Jáva“ të Prishtinës! Ka specializuar për Public Relations në Zvicër;
Si Drejtor Egzekutiv ka punuar në shumë Shtëpi Botuese Europiane, si “ Süddeutsche Zeitung Verlag” Basel – Zvicër, në Kompaninë Internacionale,”Car4you Schweiz AG”, pastaj si Drejtor Ekzekutiv në “Tel-Express AG”, Agjenci për Relacionet
Publike të” Bertelsmann-it” dhe si zv.Dreitor i Përgjithshëm në Kompaninë Botuese” Bertelsmann Schweiz AG ,
Në vitet 1997-98 ishte edhe Botues i javores“Zëri” të Prishtinës, për Europë dhe SHBA.