Albion Shabani me origjinë nga Letovica e Luginës së Preshevës u diplomua në universitetin e njohur amerikan

Nga i njëjti universitet 7 vjet më parë u diplomua vëllai i tij, Valdon Shabani dhe 25 vjet më parë studioi babai tij, Destan Shabani.
Sudenti shqiptar flet anglisht, shqip dhe spanjisht dhe i ka për pasion sportet amerikane dhe hedhjet me parashutë.
 

Nga Adnan Mehmeti, Dallas, Teksas

Mjedisi i origjinës së prindërve të tij, është bërë një udhërrëfyes për të hedhur hapat e sigurtë në jetë. Ëndërrat dhe pasionet, për futbollin, notin, muzikën, aktrimin, alpinizmin dhe hedhjet me parashutë kanë zhbiruar në karakterin e tij, realitetin, që reflektohet me synimin drejt përsosjes, por edhe për të treguar tributet e vendit të të parëve të tij, -Lugina e Preshevës. Djaloshi modest, shqiptaro-amerikan, Albion Shabani i çiltër dhe mjaft dinjitoz ka një dëshirë të prekë Hoollywoodin, aty ku ndërrthuren e integrohen miliona ëndërra, aty ku talenti dhe virtyti bashkëjetojnë me; imagjinatën, emocionin, filozofinë, e bukura dhe e shëmtuara, shijet artistike dhe estetike, enthusiazmi dhe optimizmi, limfa e mençurisë dhe urtësisë, sfida e mbijetesa, ku kapet e ardhmja dhe fama.
 

Në graduimin në Universitetin Denton në Teksas 19 dhjetor 2009

Albion Shabani, lindi më 25 shtator 1986 në Dallas të Teksasit, në një familje intelektuale dhe atdhetare, nga Lugina e Preshevës, të emigruar 30 vjet më parë në SHBA-ës. I rritur me optimizmin dhe entusiazmin e jetës në shoqërinë amerikane, krenar dhe ëndërrues, se në jetë njeriu nuk ka vetëm detyra për të përmbushur, por edhe të drejtën për t’i gëzuar dhe pasuruar ato. Babai i Albionit, Destan Shabani nga Letovica, ish profesor i anglishtes në gjimnazet e Preshevës e të Bujanocit, vjen në Amerikë për studime pasuniversitare. Por në shpirtin dhe zemrën e mësonjësit kurrë nuk u shua dashuria për vendlindjen. Albioni kujton fëmijërinë e tij, kur babai i tyre, mësonjësi i anglishtes iu tregonte peisazhin e bukur tejet koloristik të Luginës së Preshevës dhe faqet e legjendave shqiptare, që si një jehonë e largët zgjeronte përmasat e përfytyrimit, të përmallimit, duke e sjellë shumë pranë dashurinë për vendlindjen dhe edukonte ndjenjën e patriotizmit te djaloshi shqiptaro-amerikan. Nëna e Albionit, Ramizja nga Muhovci, e edukuar nga babai i saj arsimtar e përcolli tek fëmijët traditën e arsmit.
Edhe pse ka studiuar për një fushë tjetër, Albion Shabani ka pasion këngën dhe aktrimin. Deri më sot ai ka xhiruar shumë sekuenca filmike. Është aktiv, energjik, inteligjent dhe një pasionant i hedhjes me parashutë. Shumë herë është hedhur me parashutë nga avioni, një sport popullor dhe traditë e amerikanëve edhe pse me nje kosto rrezikshmërie për jetën.

 

Albion Shabani duke ndarë gëzimin me familje

Albion Shabani është diplomuar në: Bachelors of Arts in Audiology /Speech Pathology, në të njëjtin Universitet, ku 25 vjet më parë mbaroi studimet pasuniversitare, babai i tij, Destan Shabani, dhe 7 vjet më parë vëllai i Albionit,Valdon Shabani, me një përgjegjësi ndaj vetes për t’i përfunduar studimet dhe vazhduar traditën e arsimimit të familjes në Universitetin e Dentonit në Teksas. Edhe pse i lindur në Amerikë ai flet e shkruan shumë mirë gjuhën shqipe. Është shumë i lidhur ngushtë me vendlindjen e të atit.

Albioni me babain Destanin nga Letovica dhe nënën Ramizen nga Muhovci

Ja si shprehet Albioni për Letovicën e Luginës së Preshevës, vendlindjen e prindërve:
“E dua vendin tim shumë. Unë nuk kam jetuar atje, sepse prindërit e mij emigruan para se unë të lindja, por në zemrën time jeton dashuria e malli për të. Unë jam krenar që jam amerikan, siç krenohem që jam shqiptar. Unë vërtet jam amerikan, por jam rritur me gjuhën shqipe, me kulturën e traditat e popullit tim shqiptar. Jam lidhur ngushtë me vendin tim, sa angazhimet e mija profesionale i dyzoj ndaj dy vendeve: Amerikës dhe Shqipërisë! Kam gjyshërit e mij që jetojnë në Luginën e Preshevës, kusherinj, të afërm, dhe shumë shokë me të cilët mbaj kontakte të vazhdueshme. I ndjej hallet e tyre sikundër për veten time, dhe gëzohem kur dëgjoj për sukseset dhe arritjet e tyre në fusha të ndryshme, në veçanti kur ata studiojnë në universitete të ndryshme. Luftën e Kosovës e kam përjetuar si pjesë e tragjedisë të popullit tim dhe natyrisht jam krenar që me përkrahjen e Amerikës, ëndërra e Kosovës sime për pavarësi u realizua. Më kujtohen ato skena të dhimbshme, dhjetë vjet më parë ku babai dhe xhaxhai dërguan garancionet për t’i sjellë disa familje shqiptare në shtëpitë tona në SHBA.”
 

Ky është hobi I Albion Shabanit

Albion Shabani, jetën dhe studimet i shikon si sfida të ndryshimit, të flakjes tutje të egos dhe fillon të mendojë, ndjejë, besojë e jetojë atë ç’ka i thotë zemra. Ka një mirëkuptim dhe inteligjencë që e çojnë drejt së ardhmes. Drejt limiteve të reja ku ndërthurren kultura e tradita, historia dhe socialja, ndihmon që të mos shitet shpirti, përkrah kulturës, dinjitetit, emancipimit të një shoqërie të lirë në demokracinë amerikane duke ruajtur magjinë e mjedisit shqiptar, prej së cilës kullon drita e shqiptarizmës dhe forca e inteligjencës dhe karakterit të shqiptaro-amerikanit, Albion Shabani.