TRUPI KOORDINUES DHE “RINIA E JUSTINIT”

Bozhurët e Rasimit

Paramendoni reagimet: sikur fëmijët shqiptarë (për shembull ata të Suharekës), të cilët për të kënduar për traumat e tyre, të kërkonin ndihmë financiare nga Trupi Koordinues dhe Rasim Lajiqi do t’ua miratonte atë?

Shkruan: Nikolla Laziq

Nën patronatin e Trupit Koordinues për jugun e Serbisë, të cilin e kryeson Rasim Lajiqi, në sallën e teatrit të qytetit të Vranjës qe tubuar një shoqëri mjaft interesante. Në të njëjtën vend dhe nën të njëjtin kulm, në kuadër të një projekti, qenë bashkuar: Kuvendi Komunal i Vranjës, “Simpo”-ja e pashmangshme, organizata nacionale-ortodokse: “Rinia e Justinit” (Omladine Justinove) dhe trupa teatrore për fëmijë: “Bozhurët e Kosovës” themeluese e së cilës është Ivana Zhigon, artiste dhe aktiviste e verifikuar për çështjen e përgjithshme pan-ortodokse dhe kombëtare. Pra, të gjithë organizatorët e koncertit “Bozhurët e Kosovës” i bashkoi Trupi Koordinues, institucion ky, i cili për detyrë themelore (së paku siç shkruan në letër), e ka pajtimin e serbëve dhe shqiptarëve në jugun e Serbisë.

AMNEZIA

Para se ta shtrojmë pyetjen se si u bë që Trupi Koordinues të gjendet në këtë “shoqëri”, sigurisht që është më mirë t’i përshkruajmë aktorët e tjerë të programit, si dhe atmosferën që mbretëronte në koncert. Grupin “Bozhurët e Kosovës” e përbëjnë vogëlushët serbë nga Kosova, dalja e të cilëve në skenë do të duhej të përcillej me emocione prej secilit njeri të arsyeshëm. Mjafton vetëm të mendosh se prej nga vijnë dhe në çfarë kushtesh jetojnë, aktualisht, ata fëmijë që të kaplojë ndjenja e pikëllimit. Fëmijët këndojnë: për vdekjen, për fëmijërinë e humbur, për vatrat e tyre, si dhe luten që të lihen të qetë. Viteve të fundit, disa prej këtyre fëmijëve kanë humbur më të dashurit e tyre në Kosovë. Mirëpo, një çështje me këtë rast kërkon një analizë më të thellë: Përse dhe kujt i drejtohet në të vërtetë zonja Zhigon nëpërmes këtyre fëmijëve, të cilët konsiderohen të pafajshëm dhe të cilët mund të manipulohen lehtë? Ndoshta fëmijëve nuk u kujtohet se cilat janë arsyet dhe shkaqet e vërteta përse nuk kanë një fëmijëri të denjë dhe një jetë që nuk përkon me nevojat e tyre reale. Por, për këtë kujdeset Ivana Zhigon, e sigurisht edhe pjesa dërmuese e të pranishmëve në sallën e teatrit, posaçërisht ata të rendit të parë. A është ndokush duke u mashtruar, apo dikush tenton që të përfitojë nga fatkeqësia e fëmijëve serbë të Kosovës? Njëri nga organizatorët e koncertit ishte edhe pushteti lokal i Vranjës, përfaqësuesit e të cilit e përcollën atë nga radhët e para, të “përforcuar” nga prania e Budimir Mihajlloviqit, drejtorit të përgjithshëm të kompanisë “Simpo”. Koncerti “Bozhurët e Kosovës” i provokoi ndjenjat e të pranishmëve. Në shprehjen e emocioneve më tepër u dëshmuan, natyrisht, i zëshmi Mihajlloviqi dhe prefekti i Vranjës: Stojçiqi me suitën e tij, të cilët ishin ulur në rendin e parë së bashku me përfaqësuesit e kishës ortodokse, që dukeshin, gjithashtu, të tronditur. Sigurisht që të gjithë e përcollën me vëmendje të madhe koncertin, të cilin e hapën me fjalime të zjarrta një vashë dhe një djalë nga radhët e “Rinisë së Justinit”. Në mesin e të pranishëmve, më së shumti ngazëllim ngjalli pika e fundit e programit, të cilën i tërë publiku e përcolli, madje, në këmbë. Stojçiqi dhe suita e tij e përcollën duke kënduar hitin: “Vidovdan”. Deri në këtë pikë çdo gjë ishte, sipërfaqësisht, në rregull. Mirëpo, organizimin e koncertit të “Bozhurëve” e kishte ndërmarrë “Rinia e Justinit”, një organizatë joqeveritare e afërt me Kishën Ortodokse Serbe, e cila vepron në komunën e Vranjës; gjë që doemos nxit pyetjen logjike: Pse duhej të ishin të pranishëm organet shtetërore në këtë koncert, aq më tepër kur dihet se Serbia - së paku zyrtarisht deri në këtë moment - është shtet sekular. Zoran Antiqi, zëdhënës i Këshillit Komunal të Vranjës, thotë se ideja e koncertit ishte tërheqëse. Ai shton se Komuna e ka siguruar sallën dhe darken, për pesëmbëdhjetë njerëz, që të dyja kanë kushtuar rreth 8.000,00 dinarë. Në pyetjen se nga cili buxhet është financuar, një gjë e tillë,  Antiqi përgjigjet se nuk ka njohuri për këtë!

- Përfaqësuesit e “Rinisë së Justinit” kanë kërkuar prej neve që t’u ndihmojmë. Kjo organizatë ka aktivitete shumë interesante. Ne nuk bëjmë asgjë që i dëmton interesat e përgjithshme. Fëmijët nga Kosova janë shumë simpatikë dhe në atë koncert asgjë nuk ka qenë me konotacion politik. Derisa aktivitetet e “Rinisë së Justinit” do të kenë ndjenja shpirtërore, ne do t’i mbështesim – sqaron Antiqi.

“Simpo”, kompani kjo prestigjioze dhe me traditë, është një bëmirëse e njohur në këto anë. Gjatë tërë kohës së koncertit, Mihajlloviqi ishte i magjepsur, gjë që e arsyetoi pjesën e mjeteve financiare, që i kishte investuar për këtë program. Ndoshta do t’ju kujtohet kur vetë kryetari Tadiq (i cili zyrtarisht është kryetar i të gjithë qytetarëve të Serbisë) pati thënë me një rast se “Simpo”-ja është njëlloj mbrojtësi i serbizmit në jug! Më në fund, edhe “Rinisë së Justinit” i shkruan që gjatë aktiviteteve të tyre, ata të merren me zgjimin e vetëdijes kombëtare. Pra, në pyetje janë njerëzit dhe institucionet, të cilëve nuk mund t’u zihet shumë për të madhe, pos ndoshta mungesa e shijes, natyrisht, artistike.

ORGANIZIMI

Mirëpo, çfarë kërkon aty Trupi Koordinues? Paraqitja e tyre publike në këtë manifestim është shumë më tepër se shkelje e normave etike dhe mungesës së një shije të mirë. Madje vështirë që ky koncert do t’i afrojë serbët dhe shqiptarët. Kjo megjithatë nuk nënkupton se Trupi Koordinues nuk duhet ta sponzorojë kulturën dhe artin. Përkundrazi. Por, paramendoni reagimet: sikur fëmijët shqiptarë (për shembull ata të Suharekës) të cilët për të kënduar për traumat e tyre, të kërkonin ndihmë financiare nga Trupi Koordinues dhe Rasim Lajiqi do t’ua miratonte atë? Sigurisht që ministri nuk do të kalonte çaste të mira. Përse atëherë Trupi Koordinues merr pjesë në një manifestim, i cili është organizuar nga “Rinia e Justinit”, që njihet si një organizatë nacional-ortodokse dhe që nuk mëton, sigurisht, të bashkohet me ndonjë organizatë të ngjashme shqiptare? Sipas një automatizmi del si përfundim se organizimi i këtij koncerti është mirëpritur edhe nga pala shqiptare, e cila merr pjesë në përbërjen e Trupit Koordinues. Por, kjo nuk është fare ashtu. Njëri nga nënkryetarët e Trupit Koordinues: prefekti i Bujanocit, Nagip Arifi, mbetet i habitur kur e pyesim se prej kur ka krijuar partneritet me “Justinët” dhe se a ka marrë edhe ai pjesë edhe ai pjesë në vendimin për ta sponzoruar Ivana Zhigonin? “Unë nuk e di se për çka është fjala. E tërë kjo dëshmon se Trupi Koordinues është vetëm një shkronjë e vdekur në letër”, shprehet i befasuar Arifi. Ngjashëm reagoi po ashtu edhe Branko Delibashiqi, anëtar i Trupit Koordinues. Ai tha, vendosmërisht, se Trupi Koordinues nuk ka qenë, assesi, i përfshirë në çështjen e koncertit dhe për këtë na udhëzoi që t’i drejtohemi personelit përkatës në Beograd. Por, as nga kabineti i Lajiqit në Beograd nuk kishin informata më të hollësishme. Bisera Buhiqi, zëvendës-shefe e kabinetit të Trupit Koordinues, së pari na pyeti se çfarë të keqe pati në atë koncert? U detyruam që t’i sqarojmë se sponzorimi i manifestimit që organizon “Rinia e Justinit” mund të ketë pasoja serioze për rajonin, i cili gjendet 400 km në jug të Beogradit. Pas kësaj, Bisera Buhiqi na përkujtoi disa detaje:

- Po, Ivana Zhigoni ka qenë në takim me kryetarin Lajiq, i cili ia ka ndarë një shumë simbolike financiare. Por nuk di asgjë më tepër, pasi që zotëri Lajiqi është shumë i zënë këto ditë.

Ivana Zhigon (artiste e provinsiensës pan-ortodokse) vjen gjithnjë me ëndje në Vranjë, gjë që kjo nuk ndodh rastësisht:

- Siç keni dëgjuar pas mbajtjes së koncertit, pati fjalë falënderimi për Trupin Koordinues të jugut të Serbisë, për Kuvendin Komunal të Vranjës, për Peshkopatën e Vranjës, si dhe për “Simpo”-n. Kjo nuk është rastësi, pasi që Vranja kufizohet me Kosovën, kufi të cilin natyrisht nuk e njohim. Në Vranjë tubohemi shpesh, meqë jemi shumë të mirëpritur. Madje vetë keni mund të bindeni për emocionet, që mbretëruan gjatë koncertit. Qytetarët e Vranjës kanë pasur rastin, ekskluziv, që t’i shohin e dëgjojnë edhe fituesit e festivalit “Kalorësi i artë” (Zllatni vitez), i cili është mbajtur në Bjellorusi.. Ky është një festival, i cili nuk njeh kufij në tërë hapësirën ortodokse, ngase çdo vjet ai mbahet nëpër qytete dhe vende të ndryshme. Duke iu falënderuar Trupit Koordinues, ajo uroi që ky koncert të jetë vetëm fillimi i një bashkëpunim më të frytshëm reciprok:

- E kemi filluar bashkëpunimin me Trupin Koordinues, pikërisht, me rastin e realizimit të këtij koncerti, kurse kryetari i këtij institucioni do të na përkrahë edhe më tutje. Trupi Koordinues i ka dhënë përkrahje financiare vogëlushëve nga Kosova, të cilët e dhanë këtë koncert, organizator i të cilit ishte “Rinia e Justinit” nga Vranja. Sido që të jetë, i tërë ky rrëfim nuk duhet të na habitë. Organizatat e rinisë ortodokse janë duke e përjetuar një ekspansion të vërtetë, veçanërisht në prag të fillimit të bisedimeve për statusin e Kosovës. Qëndrimet e “Dera e altarit serb” (Dveri srpske), organizatë e cila konsiderohet si mbështetëse kryesore e rinisë ortodokse, u transmetuan para ca kohësh në lajmet e para të televizionit nacional. Krahas personave me rasa, e ftuar ishte edhe Sanda Rashkoviq – Iviqi, kryetare e Qendrës Koordinuese për Kosovën.

(HAPI)