Ambasada amerikane përshëndet nënshkrimin e marrëveshjes për kyçjen e shqiptarëve në Trupin Koordinues

Beograd, 5 mars (presheva.com) - Ambasada e Shteteve të Bashkuara të Amerikës e ka përshëndetur vendimin e autoriteteve lokale në Preshevë, Bujanoc e Medvegjë për t’u përfshirë në punën e Trupit Koordinues  për jugun e Serbisë. “Ambasada e SHBA-ve e përshëndet deklaratën e përbashkët të cilën e kanë firmosur së bashku Nebojsha Çoviqi si kryetar i Trupit Koordinues për jugun e Serbisë; kryetarët e komunave të Preshevës, Bujanocit e Medvegjës; si dhe udhëheqësit lokal politik të këtyre tri komunave”, ka njoftuar Ambasada amerikane në Beograd. Në kumtesë thuhet se nënshkruesit e deklaratës janë zotuar se do të bashkëpunojnë për ta mundësuar progresin më të shpejtë dhe thelbësor në çështjet që janë të lidhura me këto tri komuna. “Në veçanti urojmë Trupin Koordinues, si dhe përfaqësuesit e Partisë për Veprim Demokratik, Lëvizjes për Progres Demokratik dhe Bashkimin Demokratik për Luginën, të cilët e kanë nënshkruar këtë marrëveshje”, thuhet në kumtesë. Ambasada e SHBA-ve, e cila deri më tash ka siguruar mbi tre milion dollarë ndihmë për këto tri komuna ka shtuar se do të vazhdojë që të mbështes përpjekjet për ta rritur stabilitetin, bashkëpunimin ndëretnik dhe progresin e jugut të Serbisë.