Çoviq: Mosfunksionimi disa mujor i Trupit Koordinues ka ndikuar që forcat e moderuara politike shqiptare ta humbin pozicionin e tyre

Beograd, 4 qershor (presheva.com) – Mosfunksionimi disa mujor i Trupit Koordinues për jugun e Serbisë ka ndikuar që frocat e moderuara politike shqiptare ta humbin pozicionin e tyre, ka thënë të enjten gjatë një konference për shtyp në Beograd, kryetari i Trupit Koordinues për jugun e Serbisë, Nebojsha Çoviqi. “Puna e Trupit Koordinues është pushuar nga marsi e deri në dhjetorin e vitit 2004. Kjo pauzë ka bërë dëme, e cila ka ndikuar para së gjithash në humbjen e pozitës së forcave të moderuara dhe demokratike shqiptare dhe të bashkësive të tjera etnike në jugun e Serbisë dhe do të duhet kohë për sanimin e kësaj situata”, ka thënë Çoviqi.

Në shtator të vitit 2004, Partia për Veprim Demokratik (PVD) e Riza Halimit i ka humbur zgjedhjet e parakohshme lokale për zgjedhjen e këshilltarëve komunalë. Partia Demokratike Shqiptare (PDSH) e Ragmi Mustafës fitoi numrin më të madh të këshilltarëve. 

Më 3 mars, në selinë e Organizatës për Siguri dhe Bashkëpunim Evropian (OSBE) në Beograd, kryetari i Partisë për Veprim Demokratik (PVD): Riza Halimi; kryetari i Lëvizjes së Progresit Demokratik (LPD): Jonuz Musliu dhe kryetari i Bashkimit Demokratik të Luginës (BDL): Skender Destani e nënshkruan Deklaratën e Përbashkët të hyrjes në Trupin Koordinues për Preshevë, Bujanoc dhe Medvegjë. Kryetari i Partisë Demokratike Shqiptare (PDSH), Ragmi Mustafa, është i vetmi nga liderët shqiptarë të Luginës së Preshevës, i cili nuk pranoi që ta nënshkruajë marrëveshjen në fjalë. Marrëveshjen po ashtu e kanë nënshkruar edhe Nagip Arifi, në cilësinë e kryetarit të Komunës së Bujanocit, Sllobodan Drashkoviqi, si kryetar i Komunës së Medvegjës dhe  Nebojsha Çoviqi, si kryetar i Trupit Koordinues.