Halimi dhe Arifi mohojnë vlerësimet e Trupit Koordinues lidhur me kriminalitetin në Luginën e Preshevës

Bujanoc- Preshevë, 30 gusht (presheva.com) – Kryetarët e komunave të Preshevës dhe të Bujanocit - të cilët e ushtrojnë po ashtu funksionin e nënkryetarëve të Trupit Kooordinues për Preshevë, Bujanoc dhe Medvegjë - Riza Halimi dhe Nagip Arifi kanë mohuar vlerësimet e nënkryetarit të Trupit Kooordinues për jugun e Serbisë, Ninosllav Kërstiqit lidhur me kriminalitetin në Luginën e Preshevës. « Gjendja e sigurisë në komunat e Preshevës, Bujanocit dhe Medvegjës është stabile, ashtu që serbët, shqiptarët, romët dhe të tjerët nuk kanë aryse që të brengosen për sigurinë e tyre personale dhe pronësore. Në bazë të raportit nga terreni përfaqësuesit më të lartë të Trupit Kooordinues, të ushtrisë, të policisë dhe të xhandarmërisë kanë vlerësuar se në territorin e jugut të Serbisë edhe më tutje është e pranishme shkallë e lartë e kriminalitetit (kontrabanda, trafikimi i drogës dhe i njerëzve…)”, pati vlerësuar të enjten nënkryetari i Trupit Kooordinues, gjenerali në pension Ninosllav Kërstiqi,, pas takimit me përfaqësuesit e forcave të përbashkëta të sigurisë në Bujanoc. “Konsiderojmë se është shumë e dëmshme praktika e cilësimeve të paargumentuara se Lugina e Preshevës është një zonë e cila karakterizohet nga shkalla e lartë e kriminalitetit. Me paraqitje të tilla rrezikohet seriozisht jo vetëm puna, por edhe vetë ekzistimi i Trupit Koordinues”,  kanë reaguar ndërkaq të hënën në një reagim të përbashkët me shkrim, Riza Halimi dhe Nagip Arifi.

Lexo në presheva.com:

Dosja: Shqiptarët dhe Trupi Koordinues