Halimi : Çoviqi dhe Trupi Kooordinues kanë bërë punë të madhe

Preshevë, 26 gusht (presheva.com) – Kryetari i komunës së Preshevës dhe i Partisë për Veprim Demokratik, Riza Halimi ka deklaruar se nuk e sheh asnjë arsye që me shkarkimin e Nebojsha Çoviqit të vihet në pikëpyetje Trupi Kooordinues. "Mendoj se do të ishte normale që të vazhdohet kontinuiteti i punës së Trupit Kooordinues dhe me këtë ndryshim ndoshta qeveria e Serbisë  ka vendosur që të ndërmerrë pjesëmarrje më aktive, por edhe përgjegjësinë për jugun e Serbisë »,  ka thënë Halimi sipas RTV B92. Ai ka rikujtuar se Trupi Kooordinues është themeluar « në kohërat e vështira për jugun e Serbisë, kur këtu janë zhvilluar luftimet e armatosura » . Sipas Halimit, « Çoviqi dhe Trupi Kooordinues kanë bërë punë të madhe në këtë periudhë, por edhe më vonë ». Qeveria e Serbisë e ka shkarkuar të enjten Nebojsha Çoviqin nga funksioni i kryetarit të Trupit Koordinues për Preshevë, Bujanoc dhe Medvegjë për shkak se deputetët e Partisë Socialdemokrate, kryetar i së cilës është Çoviqi, votuan kundër pezullimit të ligjit mbi Industrinë e Naftës së Serbisë (NIS) në parlamentin republikan.