Riza Halimi thotë se shqiptarët duhet të kyçen në grupet punuese të Trupit Koordinues - Ragmi Mustafa kundërshton

Preshevë, 23 shkurt (presheva.com) – Dy drejtuesit institucional të Komunës së Preshevës ende nuk kanë qëndrim unik lidhur me ofertën e Qeverisë së Serbisë për t’u përfshirë në Trupin Koordinues për jugun e Serbisë. Derisa Kryetari i Komunës së Preshevës dhe i Partisë për Veprim Demokratik , Riza Halimi ka pohuar se përfaqësuesit shqiptarë të vetadministrimit lokal duhet që të marrin pjesë në grupet punuese të Trupit Koordinues; Kryetari i Kuvendit Komunal të Preshevës dhe i Partisë Demokratike Shqiptare, Ragmi Mustafa ka përjashtuar mundësinë e përfshirjes në Trupin Koordinues, i cili drejtohet nga Nebojsha Çoviqi. Ndonëse para disa ditësh, Partia për Veprim Demokratik i ka paraqitur vërejtjet e saja mbi programin e Trupit Koordinues për periudhën 2005-2007, Riza Halimi ka deklaruar për agjencinë “Beta” se është shumë e rëndësishme që të vazhdojnë projektet e filluara më vitin 2003. "Përfaqësuesit shqiptarë të vetadminsitrimit lokal duhet që të përfshihen në punën e tetë grupeve punuese të Trupit Koordinues ", ka thënë Halimi pas takimit me përfaqësuesit e Ambasadës Amerikane në Beograd, të cilët kanë qëndruar të martën në Preshevë. Dy diplomatët amerikanë, Stiven Xhi dhe Gustavo Del Gado, të cilët e kanë takuar po ashtu Ragmi Mustafën kanë kërkuar sërish nga liderët shqiptarë që të kyçen në punën e Trupit Koordinues. "I kemi dhënë mbështetje të plotë shqiptarëve që të kyçen gjatë kësaj jave në Trupin Koordinues dhe këtë do ta bëjmë edhe në të ardhmen”, ka thënë sekretari i Ambasadës Amerikane në Beograd, Gustavo Delgado. Nga ana e tij, Ragmi Mustafa ka përsëritur qëndrimin e  Partisë Demokratike Shqiptare, se nuk shihet serioziteti i Qeverisë së Serbisë për funksionimin normal të Trupit Koordinues, sepse si kryetar i këtij trupi është emëruar Nebojsha Çoviqi, i cili nuk e ka marrë mbështetjen e qytetarëve në zgjedhjet e fundit.  "Partitë politike shqiptare nuk e kanë ngrirë bashkëpunimin me qeverinë. Ne nuk veprojmë jashtë institucioneve të sistemit. Do të bashkëpunojmë me Trupin Koordinues, por deri më sot nuk është definuar se si duhet të kyçen shqiptarët në punën e Trupit Koordinues”, ka nënvizuar Mustafa për “Beta”.