Liderët bujanocas nuk dëshirojnë ta komentojnë shkarkimin e Çoviqit

Bujanoc, 25 gusht (presheva.com) – Mediat në gjuhën serbe kanë njoftuar se liderët institucionalë të komunës së Bujanocit nuk kanë shfaqur gatishmëri për ta komentuar shkarkimin e Nebojsha Çoviqit nga funksioni i kryetarit të Trupit Kooordinues për Preshevë, Bujanoc dhe Medvegjë nga ana e Qeverisë së Serbisë. Kryetari i komunës së Bujanocit, i cili është njëherit edhe nënkryetar i Trupit Kooordinues, Nagip Arifi nuk ka dashur që ta komentojë vendimin e Qeverisë derisa siç ka thënë « të mos dëgjojë më shumë arsye lidhur me shkarkimin e Çoviqit ». Zëvëndësi i tij, Novica Manojlloviqi ka deklaruar po ashtu se nuk i ka të njohura « informatat zyrtare ». Kryetari i Kuvendit Komunal të Bujanocit ka pohuar nga ana e tij : « Çoviqi është zyrtar qeveritar dhe nuk dua që t"i komentojë vendimet e qeverisë serbe ». Qeveria e Serbisë e ka shkarkuar  të enjten Nebojsha Çoviqin nga funksioni i kryetarit të Trupit Koordinues për Preshevë, Bujanoc dhe Medvegjë për shkak se deputetët e Partisë Socialdemokrate, kryetar i së cilës është Çoviqi, votuan kundër pezullimit të ligjit mbi Industrinë e Naftës së Serbisë (NIS) në parlamentin republikan.