Deklaratë

LShV dënon inkuadrimin e PVD, LPD dhe BDL në Trupin Koordinues të Nebojsha Çoviqit.

Regjioni i Preshevës, Medvegjës dhe Bujanocit ka qenë pjesë e Kosovës dhe e Vilajetit të Kosovës, por më 1945 është ndarë dhunshëm dhe artificialisht nga trungu i saj – Kosova. Lëvizja e kufijve është bërë për qëllime kolonizuese të Serbisë, të shpërnguljes, dobësimit dhe  diskriminimit të popullit shqiptar, padrejtësi të cilat kanë shkaktuar konflikte dhe lufta të pareshtura, deri në luftën e armatosur, pas daljes në skenë të UÇPMB-së. Nënshkruesit e marrëveshjes së Trupit Koordinues kanë shkelur mbi gjakun e dëshmorëve të renë për liri dhe demokraci të popullatës së diskriminuar të këtij rajoni shqiptar. “Këshilli Nacional” për të nënshkruarit e kësaj marrëveshje, u dëshmua se ishte vetëm një demagogji për t’i hedhur hi në sy popullit, lojë politike për karrige dhe mbrojtje të privilegjeve të fituara me vite në dëm të popullit. Këta karrieristë nuk e kishin parasysh brengën e popullit dhe zgjidhjen e drejtë të çështjes kombëtare, prandaj edhe e sabotuan, si luftën çlirimtare, edhe formimin e Këshillit Nacional sipas vullnetit të popullit, si institucion legjitim për të vendosur për orientimet strategjike dhe për zhvillimin e demokracisë qytetare në trevën e Preshevës e më gjerë. 

Duke u futur me djallëzi dhe udhëzime çoviqiane në këtë mekanizëm të ri plotësues të politikës shoviniste të Beogradit, u arrit kulmi i mashtrimit dhe manipulimit në emër të votës së popullit. Këto veprime nuk kanë legjitimitet dhe populli i kësaj ane megjithatë do të ecë në rrugën e pa kthim për vetëvendosje, liri dhe demokraci kombëtare.

Këshilli Drejtues i LShV:

F. Aliu

Prishtinë, 7 mars 2005