Masari përshëndet marrëveshjen për përfshirjen e shqiptarëve në Trupin Koordinues

Beograd, 4 mars (presheva.com) - Shefi i Misionit të OSBE-së në Beograd, Mauricio Masari e ka përshëndetur marrëveshjen me të cilën komunat e Bujanocit, Preshevës dhe Medvegjës do t’i emërojnë përfaqësuesit e vet në Trupin Koordinues për jugun e Serbisë, ka njoftuar “Beta”. Kryetari i Partisë për Veprim Demokratik, Riza Halimi; Kryetari i Lëvizjes së Progresit Demokratik, Jonuz Musliu dhe Kryetari i Bashkimit Demokratik të Luginës, Skender Destani kanë nënshkruar marrëveshjen për t’u kyçur në Trupin Koordinues për Preshevë, Bujanoc dhe Medvegjë. Marrëveshjen e kanë nënshkruar po ashtu Nagip Arifi, në cilësinë e kryetarit të Komunës së Bujanocit dhe Sllobodan Drashkoviqi si kryetar i komunës së Medvegjës. Kryetari i Partisë Demokratike Shqiptare, Ragmi Mustafa është i vetmi nga liderët shqiptarë të Luginës së Preshevës i cili nuk ka pranuar që ta nënshkruajë marrëveshjen përkatëse. Liderët politikë shqiptarë kanë vërtetuar përfshirjen e tyre në Trupin Koordinues, duke nënshkruar të enjten në mbrëmje një marrëveshje në selinë e Organizatës për Siguri dhe Bashkëpunim Evropian (OSBE)  në Beograd. Sipas deklaratës së përbashkët të cilën e ka nënshkruar edhe kryetari i Trupit Koordinues Nebojsha Çoviqi, ky organ do ta konvokoj mbledhjen konstitutive të grupeve punuese deri më 20 mars të këtij viti. “Respektimi rigoroz i këtij orari nga të gjithë duhet ta shtojë dialogun dhe aktivitetet praktike në fushën e sigurisë, ekonomisë dhe të zhvillimti social, arsimit dhe të përfshirjes së mëtejme të pakicave kombëtare në punën e organeve të gjyqësisë”, ka thënë Masari. “Hapi tjetër është të sigurohet që të gjitha palëz të punojnë me konstruktivitet dhe seriozitet në çështjet që janë me rëndësi vendimtare e me të cilat po përballët ky vend”, ka përfunduar shefi i Misionit të OSBE-së në Beograd, Mauricio Masari. Grupet punuese do t’i trajtojnë çëshjtjet e sigurisë, arsimit, gjyqësisë, zhvillimit ekonomik, mediave, shëndetësisë dhe infrastrukturës. Ndonëse kanë marrë pjesë në nënshkrimin e deklaratës, përfaqësuesit e lartë diplomatik të BE-së, të Komisionit Evropian dhe të SHBA-ve nuk e kanë firmosur marrëveshjen si palë e tretë. Në këtë deklaratë nënshkruesit kanë theksuar zotimin për të punuar bashkë me qëllim të përmirësimit të cilësis së jetës së të gjithë qytetarëve të komunave të Preshevës, Bujanocit dhe Medvegjës. “Jemi pajtuar se përfaqësuesit e komunave Preshevë, Bujanoc e Mevdegjë duhet të bashkëpunojnë afër me Trupin Koordinues që të mundësohet përparimi më i shpejtë dhe qenësor në çështjet që janë të ndërlidhura me këto tri komunat”, thuhet në deklaratë. Ata janë pajtuar se secila komunë do ti emërojë përfaqësuesit në tetë grupe kordinuese deri të premtën, më 11 mars.

Pas vrasjës së të miturit shqiptar - Dashnim Hajrullahu - nga ana e ushtrisë serbo-malazeze në zonën kufitare Maqedoni-SMZ, Qeveria e Serbisë u ka ofruar shqiptarëve të Luginës së Preshevës që të përfshihen në Trupin Koordinues për Preshevë, Bujanoc dhe Medvegjë. Trupi Koordinues është themeluar më 16 dhjetor të vitit 2000, në kohën e konfliktit të armatosur në mes forcave serbe të sigurisë dhe pjesëtarëve të Ushtrisë Çlirimtare për Preshevë, Medvegjë dhe Bujanoc. Në përbërjen e ngushtë të Trupit Koordinues, e cila numëron tetë anëtarë janë përfshirë dy përfaqësues nga forcat e sigurisë serbe, njëri nga Ministria e Policisë (MUP) dhe tjetri nga Ministria e Mbrojtjes. Qeveria e Serbisë ka emëruar së fundi për kryetar të Trupit Koordinues: Nebojsha Çoviqin, ndërsa për nënkryetar janë zgjedhur: Rasim Lajiqi, Ninoslav Kërstiqi dhe Milisav Markoviqi. Tri vendet të tjera të nënkryetarëve janë rezervuar për kryetarët e Komunave të Preshevës, Bujanocit dhe Medvegjës. Në përbërjen e zgjeruar të Trupit Koordinues janë paraparë që të kyçen kryetarët e Kuvendeve Komunale dhe zëvëndësit e tyre. Programi i ri i Trupit Koordinues, i cili është miratuar në Qeverinë e Serbisë parashihet që të realizohet deri në vitin 2007.

Nyje:
Shqiptarët dhe Trupi Koordinues - Deklaratat, Kumtesat etj....