Masari: Çështja e jugut të Serbisë nuk duhet të internacionalizohet dhe të ndërlidhet me Kosovën

Beograd, 13 mars (presheva.com) – Seanca konstituive e grupeve punuese në kuadër të Trupit Koordinues për jugun e Serbisë të reformuar do të mbahet gjatë javës së ardhshme dhe me këtë rast do të shpaloset plani i punës, të cilin do ta mbështes OSBE-ja në mënyrë aktive, ka paralajmëruar shefi i Misionit të OSBE-së në Serbi dhe Mal të zi, Mauricio Masari. Në një intervistë për agjencinë “Beta”, ambasadori Masari ka shprehur optimizëm se problemet në jugun e Serbisë do të zgjidhen në bashkëpunim midis Qeverisë në Beograd dhe përfaqësuesit lokalë. Ai ka shtuar se kjo çështje nuk duhet të internacionalizohet dhe se bashkësia shqiptare nuk duhet të vazhdojë ta ndërlidhë me bisedimet e parapara për statusin e Kosovës. "Qëndrim i shëndosh dhe konstruktiv i bashkësisë shqiptare në jugun e Serbisë është që të punojë në kuadër të kornizës së tanishme të Trupit Koordinues të reformuar, pa asnjë kalkulim se çfarë do të ndodhë në bisedimet lidhur me të ardhmen e Kosovës”, ka thënë diplomati italian. Sipas tij, Kosova dhe jugu i Serbisë janë “dy çështje të ndara” të cilat “nuk duhen të ndërlidhen”. "Kosova është një çështje që do të zgjidhet në kuadër të Rezolutës 1244. Derisa ekzistojnë dimensione të rëndësishme ndërkombëtare në zgjidhjen e statusit të Kosovës, jugu i Serbisë nuk ka dimensione të këtilla ndërkombëtare; kjo çështje ka dimensione shtetërore dhe shqiptarët duhet që ta kuptojnë se duhet të punojnë në kudër të strukturave shtetërore”, ka shtuar Masari. “Qeveria e Serbisë duhet ta ndërtojë një shoqëri multietnike dhe që të punojë në integrim të pakicave, përfshirë edhe atë shqiptare. Integrimi i plotë i bashkësisë shqiptare përfshin edhe pjesëmarrjen e plotë  të përfaqësuesve shqiptarë në jetën politike në nivelin shtetëror”, ka përfunduar ambasadori i OSBE-së në Beograd.