Orhan Rexhepi distancohet nga Jonuz Musliu dhe paralajmëron inicimin e procedurës për shkarkimin e Riza Halimit

Preshevë, 4 mars (presheva.com) – Lideri i Lëvizjes së Progresit Demokratik në Preshevë, Orhan Rexhepi është distancuar nga kryetari i LPD-ës, Jonuz Musliu për shkak të nënshkrimit të marrëveshjes për kyçje në Trupin Koordinues për jugun e Serbisë. « Jonuz Musliu ka shkelur rëndë në parimet e luftës së ish-UÇPMB-ës, me çka ka vërtetuar përfundimisht dështimet e tij si ish-lider politik i UÇPMB-ës. Që nesër, LPD-ja në Preshevë do ta shqyrtojë pozicionin e tij si kryetar i LPD-ës », ka thënë të premten Orhan Rexhepi për « presheva.com ». Kryetari i Partisë për Veprim Demokratik, Riza Halimi; Kryetari i Lëvizjes së Progresit Demokratik, Jonuz Musliu dhe Kryetari i Bashkimit Demokratik të Luginës, Skender Destani kanë nënshkruar marrëveshjen për t’u kyçur në Trupin Koordinues për Preshevë, Bujanoc dhe Medvegjë.

Marrëveshjen e kanë nënshkruar po ashtu Nagip Arifi, në cilësinë e kryetarit të Komunës së Bujanocit dhe Sllobodan Drashkoviqi si kryetar i komunës së Medvegjës. Kryetari i Partisë Demokratike Shqiptare, Ragmi Mustafa është i vetmi nga liderët shqiptarë të Luginës së Preshevës i cili nuk ka pranuar që ta nënshkruajë marrëveshjen përkatëse. Liderët politikë shqiptarë kanë vërtetuar përfshirjen e tyre në Trupin Koordinues, duke nënshkruar të enjten në mbrëmje një marrëveshje në selinë e Organizatës për Siguri dhe Bashkëpunim Evropian (OSBE) në Beograd. Sipas deklaratës së përbashkët të cilën e ka nënshkruar edhe kryetari i Trupit Koordinues Nebojsha Çoviqi, ky organ do ta konvokoj mbledhjen konstitutive të grupeve punuese deri më 20 mars të këtij viti. Grupet punuese do të trajtojnë çëshjtjet e sigurisë, arsimit, gjyqësisë, zhvillimit ekonomik, mediave, shëndetësisë dhe infrastrukturës. Ndonëse kanë marrë pjesë në nënshkrimin e deklaratës, përfaqësuesit e lartë diplomatik të BE-së, të Komisionit Evropian dhe të SHBA-ve nuk e kanë firmosur marrëveshjen si palë e tretë. Në këtë deklaratë nënshkruesit kanë theksuar zotimin për të punuar bashkë me qëllim të përmirësimit të cilësis së jetës së të gjithë qytetarëve të komunave të Preshevës, Bujanocit dhe Medvegjës. “Jemi pajtuar se përfaqësuesit e komunave Preshevë, Bujanoc e Mevdegjë duhet të bashkëpunojnë afër me Trupin Koordinues që të mundësohet përparimi më i shpejtë dhe qenësor në çështjet që janë të ndërlidhura me këto tri komunat”, thuhet në deklaratë. Nënshkruesit janë pajtuar se secila komunë do t’i emërojë përfaqësuesit në tetë grupe punuese deri të premtën, më 11 mars. «Nënshkrimi i liderëve shqiptarë për kyçje në Trupin Koordinues serb nënkupton ringjalljen politike të Nebojsha Çoviqit dhe vrasje e sërishme e Dashnim Hajrullahut », ka pohuar ish-komandanti lokal i UÇPMB-ës së shpërbërë – Orhan Rexhepi - duke e komentuar nënshkrimin e marrëveshjes. Ai ka theksuar se do ta inicojë po ashtu procedurën e votëbesimit të kryetarit të Komunës së Preshevës - Riza Halimi – në Kuvendin Komunal. Pas vrasjës së të miturit shqiptar - Dashnim Hajrullahu - nga ana e ushtrisë serbo-malazeze në zonën kufitare Maqedoni-SMZ, Qeveria e Serbisë u ka ofruar shqiptarëve të Luginës së Preshevës që të përfshihen në Trupin Koordinues për Preshevë, Bujanoc dhe Medvegjë. Trupi Koordinues është themeluar më 16 dhjetor të vitit 2000, në kohën e konfliktit të armatosur në mes forcave serbe të sigurisë dhe pjesëtarëve të Ushtrisë Çlirimtare për Preshevë, Medvegjë dhe Bujanoc. Në përbërjen e ngushtë të Trupit Koordinues, e cila numëron tetë anëtarë janë përfshirë dy përfaqësues nga forcat e sigurisë serbe, njëri nga Ministria e Policisë (MUP) dhe tjetri nga Ministria e Mbrojtjes. Qeveria e Serbisë ka emëruar së fundi për kryetar të Trupit Koordinues: Nebojsha Çoviqin, ndërsa për nënkryetar janë zgjedhur: Rasim Lajiqi, Ninoslav Kërstiqi dhe Milisav Markoviqi. Tri vendet të tjera të nënkryetarëve janë rezervuar për kryetarët e Komunave të Preshevës, Bujanocit dhe Medvegjës. Në përbërjen e zgjeruar të Trupit Koordinues janë paraparë që të kyçen kryetarët e Kuvendeve Komunale dhe zëvëndësit e tyre. Programi i ri i Trupit Koordinues, i cili është miratuar në Qeverinë e Serbisë parashihet që të realizohet deri në vitin 2007.