Ragmi Mustafa paralajmëron pjesëmarrjen e tij në Trupin Koordinues

Preshevë, 7 dhjetor (presheva.com) - Kryetari i Kuvendit Komunal të Preshevës dhe i Partisë Demokratike Shqiptare (PDSH), Ragmi Mustafa ka paralajmëruar se do të marrë pjesë në punën e Trupit Koordinues për Preshevë, Bujanoc dhe Medvegjë në cilësinë e ushtruesit të detyrës së prefektit të Preshevës. Ai e konfirmoi këtë për mediat lokale pas takimit me kryetarin e Trupit Koordinues, Rasim Lajiqin i cili u mbajt të mërkurën në Preshevë. “Zotëri Ragmi Mustafa më siguroi se do të marrë pjesë në punën e Trupit Koordinues në cilësinë e ushtruesit të detyrës së kryetarit të Komunës së Preshevës, edhe pse subjekti i tij nuk është përfshirë në këtë organ”, ka vërtetuar pas takimit Rasim Lajiqi në një deklaratë për “presheva.com”-in. Partia Demokratike Shqiptare është i vetmi subjekt politik shqiptar i Luginës së Preshevës, i cili nuk ka pranuar deri tani të përfshihet në Trupin Koordinues. Ragmi Mustafa do ta marrë së shpejti funksionin e ushtruesit të detyrës së kryetarit të Komunës së Preshevës, me që kryetari i tanishëm Riza Halimi është revokuar nga funksioni i tij më 20 nëntor nëpërmjet deklarimit të fshehtë të qytetarëve, proces i cili nuk ka përfunduar ende ligjërisht ngase procedurat e ankimit janë në zhvillim e sipër.