Trupi Kooordinues: Megjithë shkallën e lartë të kriminalitetit, gjendja e sigurisë në jug të Serbisë mbetet stabile

Bujanoc, 25 gusht (presheva.com) - Gjendja e sigurisë në komunat e Preshevës, Bujanocit dhe Medvegjës është stabile, ashtu që serbët, shqiptarët, romët dhe të tjerët nuk kanë aryse që të brengosen për sigurinë e tyre personale dhe pronësore, kanë vlerësuar të enjten zyrtarët e Trupit Kooordinues për jugun e Serbisë dhe përfaqësuesit e forcave të sigurimit. Nënkryetari i Trupit Kooordinues, gjenerali në pension Ninosllav Kërstiqi është takuar në Bujanoc me zyrtarët e Forcave të bashkuara të sigurimti (ushtrisë, policisë e xhandarmërisë). “Në bazë të raportit nga terreni përfaqësuesit më të lartë të Trupit Kooordinues, të ushtrisë, të policisë dhe të xhandarmërisë kanë vlerësuar se në territorin e jugut të Serbisë edhe më tutje është e pranishme shkallë e lartë e kriminalitetit (kontrabanda, trafikimi me drogë dhe njerëz…)”, thuhet në kumtesën për opinion të Qendrës së Shtypit në Bujanoc. Në takim janë theksuar disa probleme të forcave të bashkuara të sigurimit, si plotësimi i pamjaftueshem i bazave në terren me kuadro profesionale, pajisja e pamjaftueshme e njësive me mjete moderne materialo-teknike dhe ndërtimi i ngadalshëm i bazës ushtarako-policore “Cepotin” afër Bujanocit. Në kumtesën për shtyp nuk bëhet e ditur nëse kanë marrë pjesë në takim nënkryetarët shqiptarë të Trupit Kooordinues, Nagip Arifi dhe Riza Halimi ; si dhe Jonuz Musliu i cili është anëtar i grupit koordinues për siguri dhe analitikë i cili vepron në kuadër të Trupit Kooordinues për Preshevë, Bujanoc dhe Medvegjë.