Liderët politikë shqiptarë – reagime kundërthënëse lidhur me dorëheqjen e Rasim Lajiqit

Preshevë – Bujanoc, 12 prill (presheva.com) – Liderët politikë shqiptarë të Luginës së Preshevës kanë reaguar të mërkurën në mënyra të ndryshme ndaj dorëheqjes së Rasim Lajiqit nga posti i kryetarit të Trupit Koordinues për Preshevë, Bujanoc dhe Medvegjë. Ushtruesi i detyrës së kryetarit të Komunës së Preshevës dhe kryetari i Partisë Demokratike Shqiptare (PDSH), Ragmi Mustafa ka deklaruar se ndonëse nuk është në dijeni me arsyet e dorëheqjes së Lajiqit, kjo nuk do të thotë se ka përfunduar procesi politik në Luginën e Preshevës. “Është koha e fundit që në kuadër të Trupit Koordinues të përfshihet edhe OSBE-ja dhe që përfaqësuesi i tyre të emërohet kryetar i Trupit Koordinues”, ka kërkuar kreu preshevar. Partneri i tij i koalicionit në pushtet lokal, Orhan Rexhepi nga Lëvizja e Progresit Demokratik (LPD) ka rishprehur nevojën që të tërhiqen partitë politike shqiptare nga Trupi Koordinues. “E kam ditur se do të shpërbëhet Trupi Koordinues. Të tërhiqen partitë shqiptare nga Trupi Koordinues dhe më pas të shohim”, ka thënë Rexhepi. Ministri për të Drejtat e Njeriut e të Minoriteteve i SMZ-së, Rasim Lajiqi ka dhënë të martën zyrtarisht dorëheqje nga posti i kryetarit të Trupit Koordinues për jug të Serbisë. Në një konferencë për gazetarë, Lajiqi ka thënë se e ka dhënë dorëheqjen për shkak të pakënaqësisë ndaj vendimit të Qeverisë së Serbisë për futjen e masave të jashtëzakonshme në Komunën e Novi Pazarit. Lajiqi, ndryshe kryetar i Partisë Demokratike të Sanxhakut - parti kryesore në Kuvendin Komunal të Novi Pazarit - ka thënë se po e jep dorëheqjen për shkak se “nuk e gëzon besimin e Qeverisë së Serbisë”. Kryetari i Kuvendit Komunal të Bujanocit, Sevdail Hyseni ka pohuar Trupi Koordinues do të dëmtohet nga largimi i Rasim Lajiqit. “Mund të vihet në pikëpyetje edhe vet funksionimi i Trupit Koordinues, i cili edhe ashtu që nga koha e nënshkrimit të Deklaratës për përfshirjen e shqiptarëve në punën e tij është ballafaquar me dorëheqje edhe të zyrtarëve të tjerë dhe ku kryesia e tij ka ende probleme me kompletimin e përbërjes së tij”, ka thënë Hyseni nga LPD-ja e Bujanocit, parti kjo e cila është larguar nga Trupi Koordinues para do kohësh. “Pas këtyre ndryshimeve ka ardhur koha që në krye të këtij institucioni të emërohet një nga liderët legjitim shqiptar të rajonit, me që edhe vendimet që i sjell Trupi Koordinues ndërlidhen pikërisht me komunat me shumicë shqiptare”, ka kërkuar kryekuvendari bujanocas duke shtuar se përndryshe do të pasojë shpërbërja e Trupit Koordinues. Kryetari i Partisë për Veprim Demokratik (PVD) Riza Halimi ka nënvizuar dorëheqja e Rasim Lajiqit është korrekte nëse është e motivuar nga mosbesimi i qeverisë ndaj tij. “Pajtohem me atë që e kam dëgjuar në arsyetim e tij se nuk mund ta ushtrojë funksionin në atmosferë mosbesimi, e cila sipas mendimit tim mbretëron në qeverinë aktuale. Pa mbështetje të drejtpërdrejtë nga qeveria është absolutisht e pamundshme të ushtrohet suksesshëm ai funksion. Nëse dorëheqja është e motivuar nga kjo, atëherë ajo është korrekte”, ka komentuar lideri opozitar preshevar duke shtuar se nuk është me rëndësi se kush e udhëheq Trupin Koordinues, por si është ai, gjë që - sipas Halimit - nuk është definuar ende. Nga ana tjetër, kandidati për prefekt të Bujanocit, Nexhmedin Saqipi ka theksuar se  dorëheqja e Rasim Lajiqit është edhe një dëshmi se interesi i popullatës së Kosovës Lindore mund të flijohet për çdo interes politik. “Më reale do të kishte qenë që z. Lajiqi të jap dorëheqje nga postet më të rëndësishme, si nga Ministria për Minoritetet dhe nga kryetari i Këshillit Nacional për Bashkëpunim me Tribunalin e Hagës sesa vetëm nga posti i kryetarit të Trupit Koordinues për Preshevë, Bujanoc dhe Medvegjë”, ka thënë Saqipi.