Lajiqi thotë se ka marrë mbështetje ndërkombëtare për qëndrimin se jugu i Serbisë është çështje e ndarë nga Kosova

Beograd, 7 korrik (presheva.com) - Kryetari i Trupit Koordinues për Preshevë, Bujanoc dhe Medvegjë, Rasim Lajiqi ka deklaruar të enjten se përfaqësuesit e bashkësisë ndërkombëtare janë të pajtimit se në jug të Serbisë ekziston një stabilitet politik, ekonomik dhe i sigurisë. Në një konferencë për gazetarë pas takimit me ambasadorët e Bashkimit Evropian, Grupit të Kontaktit dhe të organizatave ndërkombëtare; Lajiqi ka thënë se ka marrë “mbështetje” nga ata për qëndrimin se problem i jugut të Serbisë “është plotësisht i ndarë” nga zgjidhja e statusit të ardhshëm të Kosovës. "Në asnjë mënyrë nuk mund të vihet shenja e barazimit midis statusit të ardhshëm të Kosovës dhe zgjidhjes së problemeve konkrete në komunat e Preshevës, Bujanocit dhe Medvegjës”, i ka përcjellë Lajiqi qëndrimet e zyrtarëve ndërkombëtar dhe të OSBE-së. Sipas tij, jugu i Serbisë është forcuar ekonomikisht, sepse gjatë pesë viteve të fundit janë investuar rreth 4,7 miliardë dinarë, kurse vetëm gjatë gjashtë muajve të fundit rreth 228 milion dinarë.