Rasim Lajiqi jep dorëheqje nga posti i kryetarit të Trupit Koordinues

Beograd, 10 Prill (presheva.com) - Kryetari i Partisë Demokratike të Sanxhakut (SDP) Rasim Lajiqi do të jap dorëheqje nga funksioni i kryetarit të Trupit Koordinues për jug të Serbisë, ka njoftuar të hënën agjencia « Beta ». Pasi që Qeveria e Serbisë i ka vërë masat e jashtëzakonshme në komunën e Novi Pazarit, ku shumicën parlamentare e kanë pasur partitë e tubuara rreth SDP-së, Lajiqi pati paralajmëruar mundësinë e tërheqjes nga të gjitha funksionet shtetërore. Burimi i agjencisë « Beta » pohon se Lajiqi ka hequr dorë të jap dorëheqje nga posti i Ministrit për të Drejtat e Njeriut e të Minoriteteve dhe nga posti i kryetarit të Këshillit Kombëtar për bashkëpunim me Gjykatën e Hagës të SMZ-së pas bisedës me presidentin e Serbisë Boris Tadiqin dhe kryetarin e SMZ-së Svetozar Maroviqin. Gjatë ditës Lajiqi duhet të bisedojë edhe me përfaqësuesit e Qeverisë së Serbisë. Qeverinë e Serbisë në Parlamentin republikan e mbështesin dy deputetë të “Listës për Sanxhak” të Sulejman Uglaninit, shkarkimin e të cilit nga posti i kryetarit të komunës së Novi Pazarit e ka nxitur Koalicioni i Lajiqit.