Lajiqi mbetet në Trup Koordinues edhe për dy javë?

Beograd, 15 prill (presheva.com) – Ministri për të Drejtat e Njeriut e të Minoriteteve i SMZ-së, Rasim Lajiqi ka deklaruar se Kryeministri Vojisllav Koshtunica ka kërkuar nga ai që të mbetet në krye të Trupit Koordinues për jugun e Serbisë, ka njoftuar agjencia “Tanjug”. Lajiqi ka thënë se kreu i ekzekutivit ka kërkuar nga ai që të vazhdojë ta ushtrojë funksionin e tij derisa qeveria nuk e miraton dorëheqjen e tij, gjë që do të duhej të bëhet gjatë këtyre dy javëve të ardhshme.  Ministri për të Drejtat e Njeriut e të Minoriteteve i SMZ-së, Rasim Lajiqi ka dhënë të martën zyrtarisht dorëheqje nga posti i kryetarit të Trupit Koordinues për jug të Serbisë për shkak të pakënaqësisë ndaj vendimit të Qeverisë së Serbisë për futjen e masave të jashtëzakonshme në Komunën e Novi Pazarit. Lajiqi, ndryshe kryetar i Partisë Demokratike të Sanxhakut - parti kryesore në Kuvendin Komunal të Novi Pazarit - ka thënë se po e jep dorëheqjen për shkak se “nuk e gëzon besimin e Qeverisë së Serbisë”.