Lista e partive politike shqiptare për zgjedhjet parlamentare serbe emërtohet “Koalicioni i Shqiptarëve nga Lugina e Preshevës” – Riza Halimi i pari në listë

Bujanoc, 14 dhjetor (presheva.com) - Partitë politike shqiptare nga Bujanoci dhe Presheva do të marrin pjesë në zgjedhjet parlamentare të 21 janarit në kuadër të Koalicionit “Koalicioni i Shqiptarëve nga Lugina e Preshevës”, i cili nuk do të ketë bartës të listës. Në parlamentin republikan, deputetët e katër partive politike të këtij koalicioni do të angazhohen për parimet nga platforma e miratuar në janar të këtij viti. Në listë do të janë përfaqësuesit e Partisë për Veprim Demokratik, Partisë Demokratike Shqiptare, Lëvizjes për Progres Demokratik dhe Bashkimit Demokratik të Luginës. Sipas anëtarit të Partisë për Veprim Demokratik (PVD) dhe kryetarit të Këshillit për Drejtat e Njeriut në Bujanoc, Shaip Kamberi, koalicioni nuk do të ketë bartës, gjë që nuk është e obligueshme sipas ligjit, por i pari në listë do të jetë Riza Halimi, kryetar i PVD-së. “Kemi vendosur të marrim pjesë në zgjedhje për shkak të heqjes së cenzusit prej 5 për qind, nuk kemi bartës të listës, por i pari në listë do të jetë kryetari i PVD-së, Riza Halimi dhe presim që do t’i kemi përfaqësuesit tonë në Kuvendin e Serbisë”, ka thënë Kamberi për agjencinë “Beta”. Në pyetjen se për çka do të angazhohen deputetët shqiptarë në Kuvendin e Serbisë, Kamberi ka thënë se këto do të janë parimet nga platforma politike të cilët këshilltarët shqiptar nga komuna e Bujanocit, Preshevës dhe Medvegjës i kanë miratuar në janar të këtij viti, të cilat kanë të bëjnë me autonominë lokale, arsimin, shëndetësinë, policinë dhe gjyqësinë.