Lëvizja e Progresit Demokratik
Rr. e Kosovës, nr.54
BUJANOC
Data: 15.03.2006

Kryesia e Lëvizjes së Progresit Demokratik, me seli në Bujanoc, në takimin e të hënës, më 13 janar 2006  mori këtë:

V E N D I M

 Pezullohet pjesëmarrja e përfaqësuesve të Lëvizjes së Progresit Demokratik nga Trupi Koordinues për Preshevë, Bujanoc dhe Medvegjë si dhe nga gjitha Grupet Koordinuese të këtij institucioni të lartë shtetëror.

Ky vendim merret pas dorëheqjes së përfaqësuesit të LPD-së nga Grupi Koordinues për Kulturë dhe Media dhe dorëheqja e mëparshme e të deleguarit nga ky subjekt në Grupin për Analitikë dhe Projekte.

Pezullim i pjesëmarrjes nga Trupi Koordinues, vjen si rezultat i mosrealizimit të planeve aksionale të përgatitura nga Grupet Koordinuese, si dhe për shkak të vendimit të fundit të Gjykatës Supreme të Serbisë, e cila kryesisht me motive politike i dënon ish-pjesëtarët e UÇPMB-së, për vepër penale - terrorizëm.

Që nga nënshkrimi i Marrëveshjes për kyçjen e shqiptarëve në Trupin Koordinues, më 3 mars 2005, e këndej, ky institucion i lartë shtetëror, merret më tepër me çështje organizative, rreth përtëritjes së kryesisë së tij, sesa me aksione konkrete për zgjedhjen e problemeve politike dhe ekonomike në Luginën e Preshevës.

LPD ka hyrë në Trupin Koordinues me sinqeritetin më të madh për të kontribuar në avancimin e të drejtave kolektive të shqiptarëve të këtij rajoni.

LPD është pjesë aktive e proceseve demokratike jo përmes një institucioni të tillë, i cili më shumë se me çështje ekonomike merret me bllokada politike, i cili edhe ashtu, deri dje vendoste pa shqiptarët për shqiptarët. Por, gjithashtu, mendojmë se ky Trup Koordinues më tepër po e luan rolin e një Këshilli politik se sa të atij institucional shtetëror.

Duke i marrë të gjitha këto parasysh, kërkojmë edhe nga subjketet tjera politike, nënshkruese të Marrëveshjes për përfshirjen e shqiptarëve në Trupin Koordinues, të rishqyrtojnë pjesmarrjen e tyre të mëtutjeshëm në këtë institucion.