Lugina e Preshevës synon organin e saj përfaqësues

Në vlugun e procesit të zgjidhjes së statusit definitiv të Kosovës, është më se i domosdoshëm krijimi i një organi përfaqësues për shqiptarët e Luginës së Preshevës, organ ky i cili drejtpërdrejt do të mbronte interesat e shqiptarëve të këtij rajoni. Naser Aziri, nënkryetar i Partisë Demokratike Shqiptare, thekson se nuk është me rëndësi emërtimi i këtij organi. Sipas tij, e rëndësishme është që ky organ, të autorizohet për përfaqësim të interesave kombëtare.

Të mendimit të njëjtë janë edhe përfaqësuesit e tjerë politikë e institucional të këtushëm. Ata mendojnë se organi i tillë do të duhej të ishte Këshilli Kombëtar i shqiptarëve të Luginës. Nga ana tjetër, përfaqësuesit e shoqërisë civile një gjë të tillë e kanë quajtur nismë “të vonuar”, por prapë të domosdoshme. Ata kanë bërë të ditur se dilemat për krijimin e Këshilit Nacional në kuadër të ligjit apo jashtë tij, nuk ja në të rëndësishme tani pas shuarjes së Ministrisë për Minoritete dhe të Drejtat e Njeriut, e cila vepronte në kuadër të Unionit Serbi Mali i Zi. Ish Ministria e Unionit Serbi Mali i Zi, për Minoritete dhe të Drejtat e Njeriut, themelimin e Këshillave Kombëtare për pakicat e kushtëzonte të bëhej në kuadër të legjislacionit Serb. Tani kur kjo Ministri është shuar, janë shuar edhe arsyet që do të prolongonin krijimin e këtij organi tejet të rëndësishëm, vlerësojnë përfaqësuesit e shoqërisë civile.

Baki REXHEPI