Mustafa: Platforma e re politike prezentohet zyrtarisht më 10 janar

Vranjë – Preshevë, 6 janar (presheva.com) – Ushtruesi i detyrës së kryetarit të Komunës së Preshevës dhe kryetari i Partisë Demokratike Shqiptare (PDSH), Ragmi Mustafa ka bërë të ditur së platforma e re politike e partive politike shqiptare të Luginës së Preshevës do të prezentohet zyrtarisht më 10 janar.  « Deri atëherë, grupi katëranëtarësh punues i cili po punon në definimin e platformës do ta përfundoj punën e tij », ka pohuar ai të enjten gjatë një interviste për agjencinë « AVP » nga Vranja. « Jemi në kontakt të vazhdueshëm me anëtarin e grupit negociues kosovar të ngarkuar për çështjen e minoriteteve në bisedimet me Beogradin Veton Surroin drejt harmonizimit të qëndrimeve», ka theksuar pos tjerash Mustafa duke e cilësuar Veton Surroin sikur “ambasador” të Luginës së Preshevës. Kreu preshevar ka deklaruar se në të ardhmen duhet të krijohen lidhje të veçanta midis shqiptarëve të Luginës së Preshevës me Kosovën, ashtu sikurse do të krijohen lidhje të veçanta midis serbëve të Kosovës me Serbinë. « Të gjithë ato që do t’i kërkojnë serbët në Kosovë do t’i kërkojnë edhe shqiptarët e Luginës së Preshevës», ka qartësuar Mustafa.