Obradoviq: Zgjidhja e statusit të Kosovës do të sjellë stabilitet në jug të Serbisë

Beograd, 17 prill (presheva.com) - Kryeredaktori i gazetës së Vranjës "Vranjske" Vukashin Obradoviqi ka vlerësuar se zgjidhja e statusit të Kosovës do të sjellë stabilitet në jug të Serbisë, sepse “të gjitha partitë shqiptare (nga ai rajon), të cilat po nxisin euforinë nacionale do t’i humbasin argumentet për një gjë të këtillë”.  “Ndër shqiptarët ekzistojnë rryma të forta të cilat konsiderojnë se çështja e jugut të Serbisë duhet të zgjidhet në pako me Kosovën. Këtu flitet haptas për atë se të gjitha të drejtat që do të fitojnë serbët në Kosovë duhet t’i fitojnë edhe shqiptarët nga jugu i Serbisë.", ka thënë Obradoviqi në emisionin "Haptas për Kosovën", i cili do të transmetohet të hënën në mbrëmje në TV Studio B. "Çdo gjë që po ndodhë në Kosovë reflektohet edhe në jug të Serbisë – prej gjërave të mira e deri te ato më të këqijat. Ky është një raport kompleks edhe tek serbët edhe tek shqiptarët”, ka shtuar Obradoviqi.