Partitë kryesore politike shqiptare participojnë së bashku në zgjedhjet parlamentare – Riza Halimi bartës i listës?

Preshevë –Bujanoc, 5 dhjetor (presheva.com) – Katër partitë kryesore politike, të cilat tubojnë elektoratin shqiptar në Preshevë, Bujanoc dhe Medvegjë janë pajtuar që të marrin pjesë bashkërisht në zgjedhjet parlamentare serbe, ka mësuar të martën « presheva.com ». Sipas marrëveshjes së arritur me ndërmjetësimin e përfaqësuesve ndërkombëtarë, të cilën e kanë nënshkruar kryetarët e katër subjekteve politike, bartësi i listës së përbashkët do të jetë lideri i Partisë për Veprim Demokratik (PVD) dhe ish-kryetari i Komunës së Preshevës: Riza Halimi, ka njoftuar « AVP ». Nëse shqiptarët arrijnë të sigurojnë dy mandate deputetesh, atëherë një mandat do t’i takojë Partisë Demokratike Shqiptare (PDSH) e cila drejtohet nga kryetari aktual i Komunës së Preshevës - Ragmi Mustafa. Lëvizja e Progresit Demokratik (LPD) e zëvëndës-kryetarit të Komunës së Bujanocit Jonuz Musliut do të kandidojë e treta në listë, ndërkaq Bashkimi Demokratik i Luginës e zëvëndës-kryetarit të Kuvendit Komunal të Preshevës Skender Destanit e katërta me radhë.  Këto janë zgjedhjet e para parlamentare që participojnë partitë politike shqiptare të Luginës së Preshevës që nga viti 1998 kur edhe ishte vendosur dispozita ligjore e pragut natyror - censuzi.