PVD fton partitë e tjera politike shqiptare për ta themeluar Këshillin Nacional

Preshevë, 13 shtator (presheva.com) – Partia për Veprim Demokratik (PVD) fton sërish partitë e tjera politike shqiptare që të bashkohen për ta themeluar Këshillin Nacional. « Mendojmë se në bashkëpunim me partitë e tjera politike duhet që ta përshpejtojmë themelimin e Këshillit Nacional, aq më tepër në këto momente kur në rajon po ngjajnë procese të cilat mund të kenë ndikim pozitiv edhe në Luginën e Preshevës », ka deklaruar të mërkurën për « presheva.com » një zyrtar i lartë i PVD-së. Sipas tij, përpos kryetarëve të partive politike dhe këshilltarëve komunalë, në Këshillin Nacional duhet që të përfshihen « edhe përfaqësuesit e organizatave joqeveritare, shoqatave të dala nga lufta, si dhe përfaqësuesit e bashkësive islame ».