Trupi Koordinues ndihmon Këshillat e Bashkësive Islame të Kosovës

Preshevë, 11 mars (presheva.com) –Trupi Koordinues për Preshevë, Bujanoc dhe Medvegjë ka paralajmëruar se do t’i ndajë bursa medresantëve të Prishtinës nëpërmes Këshillave të Bashkësisë Islame të Bujanocit dhe të Preshevës që veprojnë në kuadër të Bashkësisë Islame të Kosovës, ka mësuar “presheva.com”. Për vitin 2006, organi i dy qeverive të Beogradit për Luginën e Preshevës do të ndajë gjithsej 335.000 dinarë për Këshillin e Bashkësisë Islame të Kosovës në Preshevë, ndërsa gjithsej 280.000 dinarë për Këshillin e Bashkësisë Islame të Kosovës në Bujanoc. Ndaj këtij vendimi ka reaguar institucioni tjetër islam, Bashkësia Islame për Preshevë, Bujanoc dhe Medvegjë (BIPBM) e cila ka vlerësuar se gjatë këtij viti Qeveria në Beograd ka privilegjuar Këshillat e Kosovës si në lëndën fetare ashtu edhe me projektet e tjera. “Kjo mund të jetë një politikë para statusit të Kosovës”, kanë tërhequr vërejtjen përfaqësuesit e BIPBM-së.