Koalicioni i Shqiptarëve të Luginës së Preshevës dorëzon listën për pjesmarrje në zgjedhjet parlamentare

Beograd, 03 Janar (presheva.com) -Partitë shqiptare nga Lugina e Preshevës i kanë dorëzuar Komisionit Zgjedhor Republikan listën e përbashkët për pjesëmarrje në zgjedhjet parlamentare. Lista zgjedhore e PVD dhe BDL ka një emër të përbashkët Koalicioni i Shqiptarëve të Luginës së Preshevës dhe ka 10 kandidatë për deputet, nga të cilët 4 janë femra. Shqiptarët marrin pjesë në zgjedhjet parlamentare në Serbi pas 10 viteve.

Në krye të listës janë dy udhëheqësit e partive, Riza Halimi (PVD) dhe Skender Destani (BDL) në vendin e tretë në listë gjendet kryetari i komunës së Bujanocit Nagip Arifi. Listën e kanë përkrahur 3180 votues me nënshkrimet e tyre.
 

Riza Halimi për B92 ka deklaruar se do të luftojë për regjionalizimin dhe decentralizimin e Serbisë dhe zgjidhje serioze të të drejtave të pakicave. "Kemi shpresa të mëdha se në këto zgjedhje do të dominojnë, fitojnë partitë demokratike dhe opcioni proevropian dhe problemet e pakicave do të zgjidhen seriozisht. Po mundohemi t'i bindim votuesit tanë se kemi gjasa të kyçemi në instanca të larta të pushtetit në atë masë sa jemi pjesmarrës".

Për të fituar së paku dy vende në parlament Koalicioni i Shqiptarëve të Luginës së Preshevës duhet të merr rreth 30.000 vota apo pjesmarrje në zgjedhje të
gjysmës së votuesve të regjistruar të këtyre komunave.