Liderët kosovarë mbështesin pjesmarrjen e shqiptarëve në zgjedhjet Parlamentare

Delegacioni nga Lugina e Preshevës në përbërje të të cilit ishin Riza Halimi, Skënder Destani, Nagip Arifi dhe Shaip Kamberi është takuar sot me kryeministrin Agim Çeku, presidentin e Kosovës, Fatmir Sejdiu, dhe me kryeparlamentarin e Kosovës, Kolë Berisha.

Gjatë këtyre takimeve, me përfaqësuesit e shqiptarëve të Luginës, liderët kosovarë kanë diskutuar për rrjedhat aktuale në Kosovë, në Luginën e Preshevës dhe në rajon.
Vëmendje e veçantë, gjatë këtyre takimeve, iu kushtua edhe çështjes së pjesëmarrjes ose mospjesëmarrjes së shqiptarëve të Luginës së Preshevës në zgjedhjet në Serbi.

“Është një qëndrim i përbashkët i ekipit të unitetit se mbështesim qëndrimin e tyre që të jenë pjesë e procesit dhe që të kontribuojnë maksimalisht në jetë sa më normale në stabilitetin e përgjithshëm dhe në realizimin e interesave të qytetarëve”, u shpreh pas takimit presidenti Sejdiu.
Ndërkaq kryetari i Partisë për Veprim Demokratik, Riza Halimi, ka shpjeguar se koalicioni i shqiptarëve në Luginën e Preshevës ka një program zgjedhor që bazohet në platformën politike të shqiptarëve.
“Siç shihet ka një mbështetje të fortë nga presidenti Sejdiu, kryetari i Qeverisë, Çeku, dhe nga kryeparlamentari Berisha, sikur që mori përkrahjen edhe nga institucionet më të larta të Shqipërisë por edhe të SHBA-së, Bashkësisë Evropiane dhe në përgjithësi të komunitetit ndërkombëtarë”, u shpreh Halimi lidhur me këtë platformë.
“Duke marrë pjesë në zgjedhje, duke siguruar vende në Parlament, ne do të arrijmë të mbrojmë të drejtat e qytetarëve që përfaqësojmë”, theksoi ai.

(Telegrafi)