PD e Tadiqit dhe Koshtunica përshëndesin vendimin për pjesmarrje të partive shqiptare në zgjedhje

Preshevë, 4 Janar (presheva.com) - Partia Demokratike e Boris Tadiqit ka përshëndetur vendimin e partive shqiptare që veprojnë në Preshevë, Bujanoc dhe Medvegjë për të marrë pjesë në zgjedhjet parlamentare. Zëdhënësja e PD-së, Jelena Markoviq ka deklaruar se pjesëmarrja e shqiptarëve në zgjedhje do të kontribojë në integrimin e tyre në sistemin shoqëror të Serbisë. Markoviq ka shtuar se PD pret që pjesëmarrja e shqiptarëve në jetën politike të Serbisë nuk do të përfundojë me pjesëmarrjen në zgjedhje. "Dëshirojmë që ata nesër të jenë partner të shumicës së partive politike në qeveri, institucioneve të ndryshme, në qeveri, përkatësisht të jenë të integruar në atë mënyrë që është realizuar integrimi i tyre në Jug të Serbisë" ka deklaruar zëdhënësja e PD.

Vendimin e partive shqiptare për të marrë pjesë në zgjedhje e ka përshëndetur edhe kryetari i qeverisë së Serbisë Voisllav Koshtunica. Koshtunica ka deklaruar se hyrja eventuale e partive shqiptare në parlament do të ishte "vetëm në interes".
Koshtunica i ka deklaruar gazetarëve se do të ishte i frytshëm formimi i Këshillit Nacional Shqiptar.
Sipas fjalëve të tij kyçja e pakicës shqiptare në parlament do të ishte në interes të gjithë shtetit, siç është në interes edhe kyçja e pakicave tjera kombëtare.

Komisioni Zgjedhor Republikan ka vendosur që Koalicioni i Shqiptarëve të Luginës së Preshevës të vendoset në numrin 17 në Listat votuese.