Qeveria e Kosovës fton sërish për pjesëmarrje në zgjedhjet parlamentare serbe dhe paralajmëron hapjen e zyres ndërlidhëse për Luginën e Preshevës

Prishtinë, 18 Janar (presheva.com) - Qeveria e Kosovës, përmes zëdhënëses Ulpiana Lama, të enjten u ka bërë sërish thirrje partive politike shqiptare në Luginën e Preshevës që të marrin pjesë në zgjedhjet e së dielës në Serbi, të marrin pjesë në procesin politik dhe t'i adresojnë përmes rrugëve institucionale shqetësimet e pakicës shqiptare në këtë vend bënë të ditur e përditshmja "LAJM". Por, sipas Lamës, Qeveria e Kosovës është e vetëdijshme se problemet e popullatës shqiptare në Luginën e Preshevës nuk mund të ezaurohen vetëm me një thirrje publike për pjesëmarrje në zgjedhje. Ajo tha se Qeveria është duke punuar për nismën e krijimit të një Zyre ndërlidhëse për Luginën e Preshevës në Kosovë. "Aktualisht po punohet në draftimin e termave të referencës. Kjo zyrë do të reflektojë kërkesat dhe nevojat e popullatës shqiptare në Luginën e Preshevës. Ndërkaq gama e problemeve që do t’i trajtojë kjo zyrë përfshin arsimimin, adresimin e shqetësimeve të personave të zhvendosur, sigurimin e një mekanike më adekuate për përfaqësimin e interesave të shqiptarëve të Luginës së Preshevës në sistemin politik institucional të Serbisë dhe çështjet e tjera".